اسلام آباد۔10اپریل(اے پی پی) پاکستان مقبوضہ فلسطینی علاقے بالخصوص غزہ اچ اسرائیلی قابض افواج دی طرفوں جاری جارحیت اتے ظلم دی شدید ترین الفاظ اچ مذمت کریندے آکھیے بہیمانہ تشدد ہزاراں بے گناہ فلسطینیاں دیاں جاناں گھن ڳھدن جنہاں اچ تریمتاں ، ٻال، طبی عملہ، صحافی اتے انسانی ہمدردی سانڳے کم کرݨ آلے کارکنان شامل ہن جیڑھے جو اسرائیل دے وحشیانہ قبضے دے ھک ٻئے سیاہ باب دی نشاندہی کریندن ۔ ترجمان دفتر خارجہ شفقت علی خان پریس بریفنگ اچ آکھیے اسرائیلی بربریت دے تازہ ترین واقعات اچ براہ راست فائرنگ دے دوران 15 فلسطینی ایمرجنسی اتے سول ڈیفنس دے کارکناں کوں بے رحمی نال شہید کرݙتا ڳئے ، سارے آڈیو تے ویڈیو شواہد اسرائیل دے نہتے بے گناہ فلسطینی شہریاں دے خلاف طاقت دے اندھا دھند استعمال دی تصدیق کیتی اے ۔ ، پاکستان عالمی برادری توں مطالبہ کریندے جو او ایں بربریت دا وختی نوٹس گھنے تے بین الاقوامی قوانین تے اقوام متحدہ دے چارٹر دی ایں صریح خلاف ورزی کوں روکے۔ ترجمان آکھیے پاکستان مسئلہ فلسطین دے پرامن حل تے ݙو ریاستی حل دے نفاذ سانڳے آندے اعلیٰ سطحی بین الاقوامی کانفرنس دی مکمل حمایت دا اعادہ کریندے ۔ انہاں جون 2025 دی کانفرنس سانڳے تیاری متعلق مشاورت دی مشترکہ صدارت کرݨ تے فرانس اتے سعودی عرب دی تعریف کیتی۔ انہاں توقع ظاہر کیتی جو کانفرنس بامقصد کارروائی دے ذریعے امن اتے انصاف دی امید بحال کریسی ۔ اساں سمجھدوں جو جنگ بندی کوں مکمل طور تے نافذ کیتا ونڄݨا چاہیدے ، غزہ دی ناکہ بندی ختم کیتی ونڄے ، انسانی ہمدردی دی رسائی دی ضمانت ہووݨی چاہیدی اے، شہریاں تے انسانی ہمدردی دے عملے کوں تحفظ ݙتا ونڄݨا چاہیدے ۔ ترجمان آکھیے فلسطینیاں کوں زبردستی بے گھر کرݨ یا انہاں دی سرزمین تے قبضہ کرݨ دی کہیں وی کوشش کوں واضح طور تے مسترد اتے موثر طریقے نال روکݨا چاہیدے۔
