اسلام آباد۔11اپریل(اے پی پی) وفاقی وزیرداخلہ محسن نقوی نال سلطنت عمان دے سفیر فہد سلیمان خلف الخروسی ملاقات کیتی جئیں اچ سانجھی دلچسپی دے امور تے ݙوپاسے تعلقات تے ڳالھ مہاڑ کیتی ڳئی ۔ اتھاں تھیوݨ آلی ملاقات اچ پاکستان اتے عمان وچال تعلقات مزید ودھاوݨ دا عزم ، سکیورٹی تعاون ودھاوݨ تے اتفاق کیتا ڳئے ۔ وزیر داخلہ محسن نقوی آھیے پاکستان عمان نال برادرانہ تعلقات کوں اہمیت ݙیندے ، پاکستان تےعمان وچال برادرانہ تاریخی تعلقات مشترکہ عقیدے اتے ثقافت تے قائم ہن۔ انہاں آکھیے ترائے لکھ توں ودھ پاکستانی عمان اچ رہندے پئن تے عمان دی تعمیرو ترقی اچ چنڳاں کردار نبھیندے پئن ، کوشش اے جو ودھ توں ودھ ہنرمند لوکاں کوں عمان بھیجا ونڄے، عمانی سفیرآکھیے پاکستان تے عمان دے برادرانہ تعلقات کئی ݙھاکیں تے محیط ہن ۔عمانی سفیرعمان دی تعمیر و ترقی اچ پاکستانی کمیونٹی دے کردار دی تعریف کیتی۔
