اسلام آباد۔11اپریل(اے پی پی) وفاقی وزیرِ خزانہ محمد اورنگزیب آکھیے جو بجلی دے بضاں اچ مزید گھٹکی تے کم جاری اے ، آندے مالی سال دے بجٹ اچ تنخواہ دار طبقے کوں ریلیف ݙیوݨ سانڳے پروگرام ترتیب ݙتا ڳئے۔ میڈیا نال ڳالھ کریندے وزیرخزانہ آکھیے تنخواہ دار طبقے دے ریلیف دی تفصیلات آئی ایم ایف کنے گھن ویسوں ، بجٹ سازی سانڳے سرکاری تے نجی ݙوہیں شعبیں توں 98 فیصد تجویزاں ملئن ، بجٹ تجویزاں تے حکومت اتے نجی شعبہ رل تے کم کریندا پئے ۔ وزیرخزانہ آکھیے بجٹ تجویزاں اچ جنہاں تے عمل درآمد نہ تھی سڳیا ایں دی وجوہات متعلقہ شعبے کوں ݙسا ݙتیاں ویسن ، بجٹ کوں اسمبلی اچ پیش کرݨ توں پہلے متعلقہ شراکت داراں کوں ݙسا ݙتا ویسی جو کیڑھیاں تجویزاں تے عمل تھی سڳدے ۔یکم جولائی دے بعد بجٹ اچ کوئی تبدیلی نہ تھیسی ساݙا مقصد بجٹ تے عمل درآمد سانڳے زیادہ وقت ݙیوݨ اے ۔آئی ایم ایف متعلق امور دا ذکر کریندے انہاں آکھیے امیداے آئی ایم ایف ایگزیکٹو بورڈ مئی اچ اسٹاف سطح دے معاہدے دی منظوری ݙیسی،پاکستان آئی ایم ایف دی طرفوں ݙتے ڳئے سارے اہداف پورے کرڳھدن۔ انہاں آکھیے تاجراں توں ٹیکس وصولی بہتر تھئی اے ، تاجر دوست سکیم کوں تاجراں توں ٹیکس وصولی نال نہ جوڑیا ونڄے ، ٹیکس پالیسی شعبہ ایں کیلنڈر سال اچ وزارتِ خزانہ دے ماتحت کم شروع کرݙیسی ۔ حکومت ٹیکس دے نظام کوں سوکھا تے شفاف بݨیندی پئی اے ، ٹیکس دہندگان کوں سہولتاں ݙیوݨ اچ پرعزم ہیسے ، ٹیکس دہندگان سانڳے ایجھا فارم ترتیب ݙیندے پیوں جیڑھا ہر بندہ خود بھرسڳسی۔
