منسک ۔11اپریل(اے پی پی) پاکستان تے بیلاروس وچال دفاع، تجارت اتے ماحولیاتی تحفظ سودھے ٻئے شعبیں اچ تعاون ودھاوݨ سانڳے معاہدیں تے مفاہمت دی یادداشتاں تے دستخط کیتن۔ انہاں معاہدیں تے دستخط وزیراعظم محمد شہباز شریف دے دورہ بیلاروس دے دوران تے کیتے ڳئن۔ دستخطاں دی تقریب اچ وزیراعظم محمد شہباز شریف تے بیلاروس دے صدر الیگزینڈر لوکا شینکو وی موجود ہن۔ ݙوہیں پاسوں دے وزرا پہلے توں دستخط شدہ دستاویزات دا تبادلہ کیتے۔ پاکستان اتے بیلاروس دی حکومتاں ری ایڈمیشن دے معاہدے نال ݙوہیں ملکاں دی وزارت داخلہ وچال تعاون دے ھک معاہدے تے دستخط کیتے۔ نائب وزیراعظم / وزیر خارجہ سینیٹر اسحاق ڈار اتے بیلاروس دے وزیر داخلہ آئیوین کبراکوف دستاویزات دا تبادلہ کیتے۔ پاکستان اتے بیلاروس ݙوہیں ملکاں دی وزارت دفاع وچال تعاون دے ھک معاہدے تے دستخط کیتن تے ایں حوالے نال وزیر تجارت جام کمال خان اتے بیلاروس دے وزیر دفاع وکٹر خرینن دستاویزات دا تبادلہ کیتے۔ ݙوہیں ملکاں جمہوریہ بیلاروس دی ریاستی اتھارٹی برائے ملٹری انڈسٹری اتے دفاعی پیداوار دی وزارت وچال 2025-2027 سانڳے فوجی تکنیکی تعاون دے پروگرام (روڈ میپ) تے دستخط کیتن۔ وزیر مواصلات عبدالعلیم خان اتے بیلاروس دی ملٹری انڈسٹری دے ریاستی اتھارٹی دے وزیر دمتری پنٹس دستاویزات دا تبادلہ کیتے۔ دورے دے دوران ماحولیاتی تحفظ، پوسٹل سروسز، بزنس سپورٹ، تجارت دے ودھارے تے تجارتی اداریں وچال تعاون سانڳے ݙو پاسے معاہدیں تے وی دستخط کیتے ڳئن۔
