اسلام آباد۔11اپریل(اے پی پی) وزیراعظم پاکستان دی واضح ہدایات دی روشنی اچ پاکستان ریلوے کوں جدید، منافع بخش، پائیدار تے عوام دوست ادارہ بݨاوݨ سانڳے وزارت ریلوے اچ ھک اعلیٰ سطحی اجلاس تھئے ۔ اجلاس دی صدارت وفاقی وزیر ریلوے حنیف عباسی کیتی جئیں اچ “پاکستان ریلوے دی جدیدکاری سانڳے سٹریٹجک روڈ میپ تے تفصیلی ڳالھ مہاڑ کیتی ۔اجلاس اچ فیصلہ کیتا ڳئے جو پاکستان ریلوے کوں ھک موثر اتے تجارتی لحاظ نال فعال ادارہ بݨاوݨ سانڳے پرائیویٹ پبلک پارٹنرشپ (پی پی پی) ماڈل کوں ودھارا ݙتا ویسی ۔ ایں ماڈل دے ذریعے نجی شعبے دی شراکت توں ریلوے اچ سرمایہ کاری، تجارتی ترقی اتے بنیادی ڈھانچے دی بہتری کوں ممکن بݨایا ویسی ۔وزیراعظم دی خصوصی ہدایت تے پورے ملک دے ریلوے سٹیشنز کوں جدید خطوط تے استوار کرݨ دا جامع منصوبہ وی زیر غور آئے جئیں دا مقصد عوام کوں عالمی معیار دیاں سفری سہولتاں ݙیوݨ اے ۔ ریلوے سٹیشنز کوں کمرشل ہب اچ بدلیندے صفائی، سکیورٹی، ٹیکنالوجی اتے سہولتاں کوں اپ گریڈ کیتا ویسی تاں جو پاکستان ریلوے عوام دی پہلی ترجیح بݨے۔وفاقی وزیر ریلوے اجلاس توں خطاب کریندے پاکستان ریلوے دی بحالی صرف ھک ادارے دی ترقی نی بلکہ اے قومی معیشت دی مضبوطی دا رستہ اے۔ انہاں ایں ڳالھ تے زور ݙتے جو سارے منصوبہ جات عوامی مفاد تے شفافیت دے اصولاں تے مبنی ہوسن تے وزیراعظم پاکستان دے وژن موجب مکمل کیتے ویسن ۔ اے سٹریٹجک روڈ میپ پاکستان ریلوے کوں نہ صرف ھک جدید ادارہ بلکہ ھک قومی اثاثہ بݨاوݨ دی بنیاد رکھیندے۔
