اسلام آباد۔11اپریل(اے پی پی) سپیکر قومی اسمبلی سردار ایاز صادق چیئرمین سینیٹ سید یوسف رضا گیلانی کوں انٹر-پارلیمنٹری سپیکرز کانفرنس (آئی ایس سی) دا بانی چیئرمین نامزد تھیوݨ تے مبارخ ݙتی اے۔ آپݨے تہنیتی پیغام اچ انہاں آکھیے اے پاکستان سانڳے وݙا اعزاز اے جو ھک عالمی سطح دے بین الپارلیمانی فورم دی قیادت پاکستان کوں ݙتی ڳئی اے ۔ انہاں آکھیےچیئرمین سینیٹ سید یوسف رضا گیلانی دا اے انتخاب نہ صرف انھاں دی پارلیمانی بصیرت، تدبر تے قیادت تے عالمی برادری دے اعتماد کوں ظاہر کریندے بلکہ پاکستان دی پارلیمانی سفارت کاری دی کامیابی دا منہ ٻولیندا ثبوت اے ۔سپیکر سردار ایاز صادق ایں امید دا اظہار کیتے جو چیئرمین سینیٹ اپݨی قائدانہ صلاحیتاں دے ذریعے ایں بین الاقوامی فورم کوں موثر پلیٹ فارم اچ تبدیل کریسن جیڑھا جو عالمی پارلیماناں کوں ھک ݙوجھے دے نیڑے گھن آوݨ تے سانجھے مسئلیں دے حل دا رستہ ہموار کریسن ۔ سپیکر قومی اسمبلی مزید آکھیے چیئرمین سینیٹ دا بطور انٹر-پارلیمنٹری سپیکرز کانفرنس (آئی ایس سی) دا بانی چیئرمین نامزد تھیوݨ تے پاکستان دا مثبت تشخص عالمی سطح تے مزید مستحکم تھیسی ۔ اے تقرری دنیا اچ پاکستان دے جمہوری عمل، پارلیمانی سفارتکاری اتے عالمی تعاون اچ فعال شرکت کوں ظاہر کریندی اے ، انہاں آکھیے ایجھی اعلی سطحی کامیابیاں نال دنیا کوں اے پیغام ویندے جو پاکستان ھک ذمہ دار، ترقی پسند اتے جمہوری ملک اے، جیڑھا عالمی مسئلی دے حل اچ آپݨا بھرپور کردار ادا کرݨ سانڳے پرعزم اے۔
