اسلام آباد۔12اپریل(اے پی پی) وفاقی وزیر سمندر پار پاکستانیز چوہدری سالک حسین اوورسیز پاکستانیز دے افتتاحی کنونشن اچ اوورسیز پاکستانی شرکا دا پرتپاک خیرمقدم کیتے تے انہاں کوں ریاستی مہمان قرار ݙیندے اتحاد اتے تعاون تے زور ݙتے ۔ آپݨے ھک خصوصی ویڈیو سنھیے اچ وفاقی وزیر ٻاہرلے ملک رہݨ آلی پاکستانی کمیونٹی دی کامیابیاں دی تعریف کیتی تے کنونشن اچ انہاں دی فلاح و بہبود سانڳے حکومتی عزم دا اعادہ کیتے۔ انہاں سمندر پار پاکستانیاں نال تکڑے تعلقات دی لوڑھ تے زور ݙتے تے آکھیے ٻاہرلے ملک رہݨ آلے پاکستانی وی ملک دی ترقی اچ برابر شراکتدار ہن۔ چوہدری سالک حسین آکھیے سمندر پار پاکستانی ساݙے ملک دا قیمتی اثاثہ تے سفیر ہن جیڑھے ساݙی قوم دی ترقی اچ چنڳاں کردار نبھیندے پئن ۔ انہاں مزید آکھیے جو قیمتی ترسیلات زر، سرمایہ کاری اتے علم دی منتقلی دے ذریعے پاکستان دی اقتصادی ترقی اچ اہم کردار نبھیندن ، انہاں آکھیے وزیراعظم شہباز شریف (کل) 13 اپریل توں ٻاہرلے ملک پاکستانیاں سانڳے آپݨا پہلا انٹرایکشن کنونشن منعقد کریندے پئن جئیں دا مقصد ٻاہرلے ملک پاکستانیاں نال تعلقات کوں تکڑا کرݨ تے پاکستان دی معاشی ترقی اچ انہاں دیاں مہارتاں اتے سرمایہ کاری توں فیدے دے رستے ڳولݨ اے۔
