لاہور۔12اپریل(اے پی پی) وفاقی وزیر خزانہ محمد اورنگزیب آکھیے وزیراعظم شہباز شریف ملکی معیشت دے استحکام سانڳے ݙینھ رات متحرک ہن ،منرلزانویسٹمنٹ معاشی پاسہ صحیح ہووݨ دا ثبوت اے ، ٹیکس نظام سادہ بݨیندے پیوں ، تاجراں دے جائز مسئلے ترجیحی بنیاداں تے حل کریسوں ،انڈسٹری دی ترقی سانڳے رل تے کم کرݨا ہوسی ،ٻاہرلے سرمایہ کاراں کوں ساریاں ممکنہ سہولتاں ݙیوݨ یقینی بݨیندے پیوں ۔ اے ڳالھ انہاں لاہور چیمبر اچ میڈیا کوں ڳالھ مہاڑ کریندے آکھی ۔وفاقی وزیر خزانہ آکھیے منرلز انویسٹمنٹ فورم ساݙی معاشی سمت دا صحیح ہووݨ دا ثبوت اے ،چین ،یورپ اتے امریکہ سودھے کئی ملکاں دے نمائندیں فورم اچ شرکت کیتی اے ، ارباں ڈالرز دی منرلز انویسٹمنٹ اچ ٻہوں غیر ملکی کمپنیاں دلچسپی گھندیاں پئن ،ملک اچ معاشی استحکام گھن آوݨ سانڳے ہرپاکستان کوں کردار نبھاوݨا ہوسی ،وزیراعظم محمد شہباز شریف تے انہاں دی باصلاحیت ٹیم ملکی معیشت دے استحکام سانڳے ݙینھ رات متحرک ہن ۔ انہاں آکھیے تنخواہ دار طبقے تے ٹیکس کوں بخوبی سمجھداں، ٹیکس نظام کو ٻہوں سادہ بݨیندے پیوں ، ایجھا طبقہ جئیں دی جائیداد اتھاں ہے نہ ٻاہرلے ملک ،ایں کوں وی اوکھے ٹیکس نظام اچ الجھایا ہویا اے ،ایف بی آر اچ صاف ستھرے لوگ گھن تے آںدے پیوں ، ایف بی آر اچ فارم کوں 25 چیزاں تے گھن تے ویندے پیوں ، شہری سادہ فارم نال او بھر ݙیوے تاں ٹیکس فائل تھی ویسی ۔وزیرخزانہ آکھیے میں پاکستان دے کئی چیمبرز دے دورے کرچکیاں ،ساڈھے چھی سال ایں ملک دا ساریں توں وݙا بینک چلا تے آیاں ، اساں پبلک سورنٹس اتے اساں چیمبرز کنے حاضر تھیوݨا اے ،چیمبرز دے جائز مطالبے کوں منیا ویسی انہاں کوں حل کرݨ سانڳے سارے وسائل وسائل بروئے کار گھن آئے ویسن ۔ اساں معاشی استحکام دی ڳالھ کریندوں اے ٻہوں اہم اے جے اساں آپݨے ملک دے انویسٹر دے پیسے ویلھے تے واپس نی کرسڳدے تاں اڳوں کیویں ونڄ سڳدوں ، معاشی استحکام سانڳے افراط زر دا تلے آوݨ ٻہوں ضروری ہئی ، پہلے شرح سود 22 فیصد تے ہئی لیکن اڄ بارھاں فیصد تے ہے جے عام آدمی تے ساݙیاں پالیسیاں دا اثر نی تھیندا پیا تاں کوئی فیدہ کائنی ،ہر مہینے اساں ݙیکھدے پیوں جو دالاں ، چکن اتے سبزی دیاں قیمتاں کیا ہن اے نی تھی سڳدا جو عام بندے کوں فیدہ نہ تھیوے تے مڈل مین فیدہ چیندا رہے ،اسٹاک مارکیٹ اتے تلے تھیندی رہسی۔ انہاں آکھیے اداریں دی پرائیوٹائزیشن وی چنڳے انداز اچ کرݨ دی کوشش کریندے پیوں ۔ انھاں آکھیے وزیراعظم دی ہدایات موجب ھک کمیٹی بݨائی ڳئی اے جیڑھی جی ایس پی پلس تے کم کریندی پئی اے ایں سلسلے اچ پندراں وزارتاں تے کم جاری اے ،وفاقی بجٹ دی تیاری اچ تاجراں دیاں تجویزاں سامݨے رکھیاں ویسن ۔ آندے کجھ مہینے اچ وزیراعظم عوام سانڳے مزید ریلیف دا اعلان کریسن۔
