اسلام آباد۔15اپریل (اے پی پی) صدر مملکت آصف علی زرداری مستونگ اچ بلوچستان کانسٹیبلری دی ڳاݙی دے نیڑے دھماکے دی مذمت کریندیں ہوئیں دھماکے اچ ترائے اہلکاراں دی شہادت تے ݙکھ تے افسوس کیتے۔ منگل کوں ایوانِ صدر دے پریس ونگ موجب صدر مملکت ملکی سلامتی کیتے جان دا نذرانہ پیش کرݨ تے بلوچستان کانسٹیبلری دے اہلکاراں کوں خراجِ عقیدت پیش کیتا۔ صدر مملکت ملک توں دہشتگردی دے خاتمے کیتے کوششاں جاری رکھݨ دا عزم کیتا اتے شہیداں کیتے درجات دی بلندی اتے لواحقین کیتے صبر دی دعا کیتی۔ انہاں دھماکے اچ زخمی تھیوݨ آلیاں دی جلدی صحت یابی دی دعا کیتی۔
