اسلام آباد۔15اپریل(اے پی پی)وزیراعظم محمد شہباز شریف سمندر پار پاکستانیاں کیتے کئی سہولتاں اتے مراعات پیکیج دا اعلان کریندے آکھیے جو سمندر پار پاکستانیاں دے مسائل، مقدمات نمٹاوݨ کیتے وفاق دی سطح تے خصوصی عدالتاں ٻݨا ݙتیاں ڳن، وفاقی چارٹرڈ یونیورسٹیاں دیاں 10 ہزار نشستاں اچ اوورسیز پاکستانیاں دے ٻالاں کیتے 5 فیصد اتے وفاق دے ڈگری ݙیوݨ آلے اداریاں اچ وی 5 فیصد ڄݙاں جو میڈیکل کالجز اچ 15 فیصد کوٹہ مختص ہوسی، میرپور انٹرنیشنل ایئرپورٹ دی فزیبلٹی سٹڈی تیکھے شروع کیتی ویسی، سمندر پار پاکستانیاں کوں مقدمات دے اندراج کیتے پاکستانی سفارتخانیاں اچ ای۔فائلنگ دی سہولت 60 ݙینھ اچ ݙے ݙتی ویسی، بیرون ملک نمایاں خدمات تے 15 اوورسیز پاکستانیاں اتے سٹیٹ بینک ولوں سب توں ودھ سرمایہ پاکستان بھجواوݨ آلے 15 سمندر پار پاکستانیاں کوں ہر سال سول ایوارڈ ݙتا ویسی۔ اے ڳالھ انہاں اسلام آباد اچ سمندر پار پاکستانیاں دے کنونشن نال خطاب اچ آکھی۔ کنونشن اچ وفاقی وزرا، ارکان پارلیمان، چیف آف آرمی سٹاف جنرل سید عاصم منیر، غیر ملکی سفارتکار اتے سمندر پار پاکستانیاں دی وݙی تعداد موجود ہئی۔ وزیر اعظم آکھیا جو بیرون ملک مقیم پاکستانی خواتین دی پاکستان اچ سرکاری ملازمتاں کیتے عمر دی بالائی حد رعایت نال 5 سال توں ودھا تے 7 سال کیتی ویندی پئی اے، سمندرپار پاکستانیاں دے مسلے آپ حل کریساں، سمندر پاکستانیز سوشل میڈیا تے منفی پروپیگنڈہ روکݨ کیتے اپݨا کردار ادا کرن۔ انہاں آکھیا جو تارکین وطن ساݙے سر دے تاج اتے وطن دے سفیر ہین۔ وزیراعظم آکھیا جو اوورسیز پاکستانیاں دے خلاف جعلی مقدمہ بازی روکݨ کیتے سول کورٹ دے طریقہ کار اچ فوری ترمیم کیتی ویسی، مدعی کوں عدالت دی اجازت دے بعد دفاع دا حق ہوسی، ایف بی آر اوورسیز پاکستانیاں کوں کاروباری لین دین اتے بینک معاملات اچ بطور فائلر ڳݨسی اتے ایندے نال ٹیکس ادائیگی اچ ریلیف ملسی، نیوٹیک اوورسیز پاکستانیاں دے 5 ہزار ٻالاں کوں ہنرمندی کورسز کرویسی۔ وزیراعظم پاکستانی سفارتکاراں کوں ہدایت کیتی جو او سمندر پار پاکستانیاں نال بہترین سلوک کرن اتے ہر سوکھ ݙیوݨ اچ ہتھ ونݙاون جو سمندر پار پاکستانی نہ صرف ارباں ڈالر ترسیلات زر بھجویندن ٻھل فارن ایکسچینج ریزرو دا خلیج پر کرݨ کیتے اہم کردار ادا کریندے پین۔ انہاں سمندر پار پاکستانیاں کوں دعوت ݙتی جو او اپݨا سرمایہ پاکستان ڳھن آون، ہݨ ملک اچ سرمایہ کاری ڳھن آوݨ دا ویلھا اے۔ وزیراعظم آکھیے جو ملک اچ دہشتگردی اتے دہشتگرداں دے سہولت کاراں کوں ولا سر چاوݨ دی اجازت نا ݙتی ویسی، اپݨے شہیداں دیاں قربانیاں اتے بہادر مسلح افواج اتے قانون نافذ کرݨ آلے اداریاں دی محنت نا ونڄیڄݨ ݙیسوں، ہارڈ سٹیٹ دی لوڑے اے جو اپݨیاں افواج دے خلاف منفی پروپیڳنڈہ تے کوئی رعایت نا ورتی ونڄے۔ وزیراعظم آکھیا جو پاکستان معاشی استحکام دو ودھدا پئے، انشا اللہ تیکھے پاکستان دنیا دا طاقتور ملک ٻݨ ویسی، اوورسیز پاکستانی پاکستان دے خلاف منفی سوشل میڈیا مہم دا مہذب انداز اچ دلیل نال ولدا ݙیوݨ، ایہو پاکستان دی خدمت ہوسی۔ وزیراعظم تارکین وطن توں وعدہ ڳھدے جو او پاکستان دشمناں دا پاکستانی فوج دے دہشت گرداں نال مقابلہ کرݨ آلی کار انہان دا مقابلہ کریسن۔
