اسلام آباد۔16اپریل (اے پی پی) وزیر اعظم محمد شہباز شریف پاکستان دے زرعی شعبے کوں بدلݨ دا عزم کریندیں ہوئیں آکھیا جو پائیدار ترقی کیتے زرعی شعبے کوں جدید کرݨ ٻہوں ضروری اے۔ زرعی شعبے کوں بدلݨ کیتے پرعزم ہیسے، ہک ہزار زرعی گریجویٹس کوں ٹریننگ کیتے چین ٻھجیندے پئیوں جنہاں کوں میرٹ تے چݨیا ڳئے، چین اچ جدید زرعی ٹیکنالوجی سکھ تے واپسی آتے اساݙے نینگر زرعی ترقی اچ اہم کردار ادا کریسن۔ پاکستان اچ دیہی سطح تے چھوٹی صنعت دے ودھارے اتے ویلیو ایڈیشن کیتے نینگراں کوں سوکھی شرطاں تےقرضے ݙیسوں۔ او بدھ کوں “وزیراعظم محمد شہباز شریف” دے شعبہ زراعت دی استعداد ودھاوݨ کیتے 1000 زرعی گریجویٹس کوں اعلیٰ تربیت کیتے سکالرشپ تے چین ٻھیجݨ دے منصوبے دے پہلے مرحلے اچ ترائے سو طلبا کوں چین ٻھجواوݨ بارے تھیوݨ آلی تقریب توں خطاب کریندے پئے ہن۔ تقریب توں پاکستان اچ چین دے سفیرجیانگ زیدونگ،وفاقی وزیر غذائی تحقیق وترقی رانا تنویر حسین وی خطاب کیتا۔ وزیراعظم آپݨے خطاب اچ آکھیا جو اڄ اہم ݙینھ اے جو اساݙے نینگر گریجویٹس دوست ملک چین اچ جدیدزرعی ٹیکنالوجی سکھݨ کیتے ویندے پئن۔ انہاں آکھیا جو پاکستانیاں کیتے چین اچ ایں سہولت ݙیوݨ تے اساں چینی قیادت دا شکریہ ادا کریندوں اتے انہاں کیتے نیک خواہشات دا اظہار کریندوں۔ انہاں وزیر اتے سیکرٹری آئی ٹی دی طالب علماں دی سلیکشن کیتے پورٹل ٻݨاوݨ سودھے تعاون تے انہاں دا شکریہ ادا کیتا۔ ایندے اچ چاریں صوبے،گلگت بلتستان،آزادکشمیر توں وی نینگر شریک ہن۔ وزیراعظم آکھیا جو ایں منصوبے کیتے ترائے ارب روپے رکھیے ڳئن۔ آندے ݙو مرحلے اچ وی میرٹ کوں رکھیا ویسی۔ بلوچستان دا 10 فیصد ودھیکی کوٹہ رکھیا ڳئے۔ پاکستان اچ چین دے سفیر جیانگ زیدونگ آکھیا جو گزریل ہک سال اچ حکومت پاکستان دی کارکردگی توں ٻہوں متاثر ہیسے جئیں اچ ملک دے میکرواکنامک اشاریے بہتر تھین۔ انہاں آکھیا جو چینی حکومت پاکستان نال ݙوپاسہ تعلقات خصوصی طور زراعت دے شعبے اچ تعاون کیتے تیار اے۔ انہاں زور ݙتا جو صدر شی جن پنگ ہمیشہ پڑوسی ملکاں نال آپݨے تعلقات کوں اہمیت ݙیندن۔ چین پاکستان اقتصادی راہداری دے تحت چین تقریباً 35.4 بلین امریکی ڈالر دی براہ راست سرمایہ کاری کیتی اے جئیں نال ݙوہیں ملکاں وچال مضبوط تعلقات نشابر تھیندن۔
