اسلام آباد۔16اپریل (اے پی پی) وزیر اعظم محمد شہباز شریف جناح میڈیکل کمپلیکس دی تعمیر دے سارے مرحلے اچ سو فیصد شفافیت یقینی ٻݨاوݨ دی ہدایت کریندیں ہوئیں آکھیا جو ایں منصوبے دی تعمیر دے سارے مرحلے دی خود نگرانی کریسن۔ ڈیزائن، سپرویژن اتے تعمیر بارے کنسلٹنٹس اتے کنٹریکٹر دی خدمات بین الاقوامی ٹینڈر نال کیتی ویسن۔ بدھ کوں وزیر اعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت اسلام آباد اچ جناح میڈیکل کمپلیکس دی تعمیر بارے جائزہ اجلاس تھیا۔ ایں موقع تے وزیراعظم آکھیا جو جناح میڈیکل کمپلیکس پورے خطے کیتے بہترین طبی سہولتاں اتے جدید ترین طبی تحقیق کیتے آلات نال لیس ہسپتال ہوسی۔ اجلاس اچ وزیراعظم کوں جناح میڈیکل کمپلیکس اینڈ ریسرچ سینٹر دی تعمیر دی پیشرفت بارے بریفنگ ݙتی ڳئی۔ اجلاس اچ وفاقی وزیر منصوبہ بندی ڈاکٹر احسن اقبال، وفاقی وزیر قانون تے انصاف اعظم نذیر تارڑ، وفاقی وزیر اقتصادی امور احد خان چیمہ وفاقی وزیر صحت سید مصطفی کمال، وزیراعظم دے مشیر سید توقیر شاہ، اسلام آباد توں رکن قومی اسمبلی انجم عقیل، پروفیسر ڈاکٹر سعید اختر اتے متعلقہ اداریاں دے اعلیٰ افسرشریک تھیے۔
