اسلام آباد۔16اپریل(اے پی پی)وفاقی وزیر پٹرولیم علی پرویز ملک آکھیے جو وزیراعظم محمد شہباز شریف دا بلوچستان دی محرومیاں مکاوݨ کیتے جرأت مندانہ فیصلہ قابل تحسین اے، پاکستان دی معیشت بحالی دو ویندی پئی اے، حکومتی اقدامات نال مہانگ دی شرح ڳھٹی اے، زرمبادلہ دے ذخائر ودھدے پین۔ اسلام آباد اچ پریس کانفرنس کریندے انہاں آکھیا جو ملک تے دیوالیہ تھیوݨ دا چنتا ہا ٻھل اڄوکی حکومت اتے وزیراعظم محمد شہباز شریف دی انتھک محنت اتے بہتر معاشی پالیسیاں نال ہݨ ملک درست سمت اچ ٹر پئے اتے معاشی اعشاریے مثبت تھیندے پین، وزیر اعظم دا قومی اتحاد اتے بلوچستان دے عوام کوں سوکھ ݙیوݨ کیتے کابینہ اجلاس اچ بلوچستان اچ این۔25 کیتے وزیراعظم پاکستان پٹرول دی قیمت دی کمی ود ہولڈ کریندے اضافی وسائل استعمال کریندے N-25 کوں مکمل کرݨ دا اعلان کیتے جیڑھا خوش آئند اے، ساکوں ایں چھوٹی ڄھیں تکلیف برداشت کریندے ایں سانڳے وزیر اعظم دا ہتھ ونݙاوݨا چاہیدے، حالی وی پاکستان اچ پٹرول دی قیمت خطے دے ممالک بشمول انڈیا، بنگلہ دیش، سری لنکا نیپال دے مقابلے اچ اڄ وی ڳھت ترین سطح تے اے۔ انہاں آکھیا جو وزیراعظم بجلی دی قیمتاں اچ تقریبا 7.5روپے فی یونٹ کمی دا اعلان کیتے ڄیڑھا وݙا ریلیف اے۔ فچ ریٹنگ ایجنسی دی رپورٹ پاکستان کیتے حوصلہ افزا اے، منرل سمٹ ہک بین الاقوامی ایونٹ ٻݨ تے پاکستان دی ہک مارکیٹنگ سٹوری دے طور تے سامݨے آئی اے، اے سارے اقدامات وزیراعظم محمد شہباز شریف دی بہترین حکمت عملی اتے گورنس دا نتیجہ اے جیندا تسلسل جاری رہسی۔
