اسلام آباد۔17اپریل(اے پی پی)وزیراعظم محمد شہباز شریف پاکستان دے ہنگری نال تجارت، سرمایہ کاری و توانائی سودھا مختلف شعبیاں اچ ݙوطرفہ تعلقات تکڑے ٻݨاوݨ دا عزم دوہرائے۔ وزیر اعظم محمد شہباز شریف نال ہنگری دے وزیر خارجہ پیٹر سیجارتو دی وزیر اعظم ہائوس اچ ملاقات تھئی اے۔ وزیراعظم ہنگری دے وزیراعظم وکٹر اوربان کیتے نیک خواہشات پچیندے ݙوطرفہ تعلقات تکڑے کرݨ دی خواہش دا اظہار کیتے اتے اوربان کوں پاکستان دا سرکاری دورہ کرݨ دی دعوت ݙتی۔ وزیر اعظم ݙوہاں ملکاں دے وزراء خارجہ دی سطح تے تھیوݨ آلی ڳالھ مہاڑ دا ݙسایا اتے ہنگری نال سفارتی پاسپورٹ ہولڈرز کیتے ویزا مکاݨ سودھا ثقافت، آثار قدیمہ اتے ثقافتی ورثے دے شعبے اچ تعاون بارے مفاہمتی یادداشتاں تے دستخط کرݨ تے اطمینان کیتے۔ ݙوہاں ملکاں وچال کاروبار دے (بی ٹوبی) تبادلیاں دی اہمیت ودھیندے وزیراعظم ہنگری دے تجارتی وفد دا خیرمقدم کیتے ڄئیں اسلام آباد اچ تھیوݨ آلے پاکستان ہنگری بزنس فورم اچ شرکت کیتی۔ ملاقات اچ ݙوطرفہ تعلقات اتے علاقائی و عالمی پیش رفت تے الایا۔
