اسلام آباد۔17اپریل(اے پی پی)پاکستان اتے ہنگری سفارت کاری، ثقافت اتے ثقافتی ورثے سودھا مختلف شعبیاں اچ ݙوطرفہ تعاون ودھاوݨ تے اتفاق کریندے امن اتے کثیرالجہتی باہمی تعاون ٹورݨ دا عزم کیتے۔ اے عزم نائب وزیراعظم اتے وزیر خارجہ سینیٹر محمد اسحاق ڈار اتے پاکستان دے سرکاری دورے تے آئے ہنگری دے وزیر برائے امور خارجہ و تجارت پیٹر سیجارٹو ملاقات توں بعد منشترکہ پریس کانفرنس اچ کیتے۔ ݙوہاں رہنماواں وفود دی سطح تے تھیوݨ آلی ڳالھ مہاڑ اچ اپݨے ملکاں دے وفداں دی اڳواݨی کیتی اتے تعاون دیاں مختلف معاہدیاں تے دستخط کیتن۔ نائب وزیر اعظم سینیٹر محمد اسحاق ڈار آکھیا جو پاکستان اتے ہنگری زراعت، صحت دی ݙیکھ بھال، انفارمیشن ٹیکنالوجی اتے صنعتی مینوفیکچرنگ اچ تعاون چاہندن، معاہدیاں نال ثقافتی تعلقات ودھاوݨ اچ مدد ملسی، فریقین باہمی تعاون ودھاوݨ اتے علاقائی و عالمی چیلنجز نال نمٹݨ تے الائے۔ نائب وزیراعظم ہنگری دی ”ایسٹرن اوپننگ پالیسی“ دے تحت تعلقات تکڑے کرݨ کیتے پاکستان دے عزم دا اعادہ کیتے۔ نائب وزیراعظم جی ایس پی پلس سکیم کیتے ہنگری دی مسلسل حمایت تے شکریہ ادا کیتے۔ ݙوہاں ملکاں سفارتی پاسپورٹ رکھݨ آلیاں کیتے ویزا دی شرائط مکاوݨ سانڳے ہک معاہدے تے دستخط کیتن جیندے نال حکومت توں حکومت اتے عوامی روابط تکڑے کرݨ اچ مدد ملسی۔ نائب وزیراعظم ݙسائے جو انہاں جموں و کشمیر تے پاکستان دے اصولی موقف اتے ݙو ریاستی حل دی بنیاد تے فلسطینی کاز دی مستقل حمایت دا اعادہ کیتے اتے ہنگری دے وفد کوں افغانستان دی صورتحال اتے ایں سانڳے سکیورٹی چیلنجز دا وی ݙسائے۔ فریقین یوکرین دے تنازعے دے پرامن حل اتے تعمیری ڳالھ مہاڑ تے زور ݙتے۔
