اسلام آباد۔18اپریل (اے پی پی) وزیر اعظم محمد شہباز شریف آکھیا جو پاکستان دے دشمن اساݙی معاشی کامیابیاں توں ݙردن، دہشت گرداں کوں عبرتناک شکست ݙیسوں، دہشت گردی اتے انتہاپسندی دے خاتمے تئیں وفاقی حکومت سارے صوبیاں دی استعداد کار ودھاوݨ کیتے تعاون کریسی۔ ملک دے سارے شہم شہراں اچ سیف سٹی منصوبے جلدی پورے کیتے ونڄن۔ جمعے کوں وزیر اعظم آفس دے میڈیا ونگ توں جاری بیان موجب وزیراعظم دی صدارت اچ امن و امان دی صورتحال تے اہم جائزہ اجلاس تھیا۔ ایں موقع تے ڳالھ مہاڑ کریندیں ہوئیں وزیراعظم آکھیا جو ملک توں دہشت گردی کوں منڈھوں پٹݨ کیتے اساݙا جہاد جاری رہسی۔ دہشت گرداں کوں عبرتناک شکست ݙیسوں۔ وزیراعظم آکھیا جو دہشت گردی دے خلاف اقدامات اتے کاروائیاں بارے سارے ادارے اتے صوبیاں دی کوششاں قابل تحسین ہن۔ وزیراعظم ہدایت کیتی جو سمگلنگ دے خلاف سارے ادارے آپݨی کوششاں ٻئی تیز کرن۔ انسانی سمگلنگ دے نیٹ ورک دے گرد گھیرا تنگ کیتا ونڄے اتے سمگلراں کوں قانون دے شکنجے اچ آندا ونڄے۔ اجلاس کوں ملک اچ امن و امان بارے تفصیلی بریفنگ ݙتی ڳئی جئیں اچ ݙسیا ڳئیا جو نیکٹا اچ نیشنل اینڈ پرونشل انٹیلی جنس فیوژن اینڈ تھریٹ اسیسمنٹ مرکز ٻݨ ڳئے، بریفنگ اچ ݙسیا ڳئیا جو پنجاب دے ݙاہ شہراں اچ سیف سٹی منصوبہ کم کریندا پئے۔ کراچی، حیدرآباد، سکھر، لاڑکانہ، میر پور خاص اتے نواب شاہ اچ سیف سٹی منصوبے لاتے ویندے پئن۔ پشاور اچ سیف سٹی منصوبہ منظور تھی ڳئے۔ اگلے مرحلے اچ ڈیرہ اسماعیل خان ، بنوں، لکی مروت اچ سیف سٹی منصوبے لاتے ویسن۔ اجلاس اچ وفاقی وزیر قانون تے انصاف اعظم نذیر تارڑ، وفاقی وزیر داخلہ محسن رضا نقوی ، وفاقی وزیر اقتصادی امور احد خان چیمہ ، وفاقی وزیر اطلاعات تے نشریات عطاء اللہ تارڑ ، وزیراعظم دے مشیر برائے بین الصوبائی روابط رانا ثناءاللہ ، وزیر مملکت برائے داخلہ طلال چوہدری ، وزیر اعلیٰ خیبر پختونخوا دے مشیر اطلاعات بیرسٹر سیف، وزیر داخلہ گلگت بلتستان شمس الحق لون، وزیر داخلہ آزاد کشمیر کرنل ریٹائرڈ وقار نون، چاریں صوبے ، گلگت بلتستان اتے آزاد کشمیر دے چیف سیکریٹریز اتے انسپکٹرز جنرل پولیس، چیف کمشنر اسلام آباد کیپیٹل ٹیریٹری ، آئی جی اسلام آباد پولیس اتے ٻئے سرکاری اداریاں دے افسر شریک تھیے۔
