کوئٹہ۔ 18 اپریل (اے پی پی) وفاقی وزیر برائے منصوبہ بندی ،ترقی تے اصلاحات سینیٹر احسن اقبال اتے وزیراعلیٰ بلوچستان میر سرفرازاحمد بگٹی آکھیا جو آندے ترقیاتی بجٹ اچ بلوچستان کوں ٻئے صوبیاں توں ودھ بجٹ ݙٰیسوں، اڑان پاکستان کیتے سارے صوبیاں دی ہکو سویں ترقی ضروری اے۔ 2018داسانحہ 1971ء دے سانحہ جتنا وݙا سانحہ ہئی جئیں پاکستان کوں سیاسی بحران آلے پاسے سٹ ݙتا، جئیں کوں صادق امین آکھیا ڳئیا اوں 190 ملین پاؤنڈ دا ڈاکہ لاتا، حکومت بلوچستان اڑان پاکستان دا پارٹنر اے انہاں نال رَل تے منصوبے پورے کریسوں۔ اساݙا فوکس عام بندہ ہوسی۔ اے ڳالھیں انہاں جمعے کوں کوئٹہ اچ سانجھی پریس کانفرنس توں خطاب کریندیں ہوئیں آکھی۔ ایں موقع تے صوبائی وزرا تے اراکین اسمبلی بخت محمد کاکڑ، سردار کوہیار ڈومکی، میر عاصم کرد گیلو، مینا مجید بلوچ، عبد المجید بادینی، محمد خان لہڑی، میر لیاقت لہڑی، حاجی ولی محمد نورزئی، نوابزادہ زرین خان مگسی،ترجمان حکومت بلوچستان شاہد رند اتے ٻئے موجود ہن۔ وفاقی وزیر احسن اقبال آکھیا جو اڑان پاکستان دے تحت پاکستان دی معیشت کوں ٹریلین ڈالرز تئیں ڳھن ویسوں۔ پاکستان اچ 2010ء اچ تھیوݨ آلی آئین سازی دے بعد صوبیاں کوں خودمختاری مل ڳئی اتے ہݨ اڑان پاکستان کیتے صوبیاں دا کردار ویلھے دی لوڑھ اے۔ کچھی کینال نال بلوچستان سرسبز ٻݨ سڳدے۔ انہاں آکھیا جو کوئٹہ ژوب ڈیرہ اسماعیل خان ،کوئٹہ کراچی شاہراہ سودھے ٻئے منصوبیاں نال صوبہ ترقی کریسی۔ میرسرفراز بگٹی دی قیادت اچ بلوچستان اڑان بھریندا صوبہ ٻݨسی۔ ایں موقع تے میر سرفراز بگٹی آکھیا جو بلوچستان اڑان پاکستان دا پارٹنر اے ایندے نال رَل تے منصوبے پورے کریسوں۔
