اسلام آباد۔18اپریل(اے پی پی)وزیراعظم محمد شہبازشریف آکھیے جو قرضیاں توں نجات کیتے قومی آمدن ودھاوݨی ہوسی۔ کارکردگی سانڳے مختلف اداریاں اچ موجود سقم دور کرݨے ہوسن، معاشرے اتے سرکاری اداریاں اچ بہتری کیتے جزا و سزا دے تصور کوں اپناوݨا ہوسی۔ اے ڳآلھ انہاں فیڈرل بورڈ آف ریونیو دے پرفارمنس مینجمنٹ سسٹم دے افتتاح دی تقریب نال خطاب اچ آکھی۔ انہاں آکھیا جو ایف بی آر دی ڈیجیٹائزیشن نال ترقی دا سفر ٹر پئے، اساں پاکستان دے روشن اتے خوشحال مستقبل دی کوشش کرݨی اے اتے قرض توں نجات ݙیواوݨی اے، پچھلے سال دی نسبت ساݙے ٹیکس محصولات 27 فیصد ودھݨ چنڳی ڳالھ اے ٻھل مختلف ٹربیونلز یا عدالتاں اچ کھرباں روپے دے مقدمات دے فوری فیصلیاں کیتے اقدامات کرݨ دی لوڑھ اے، اساں زیر التوا کیسز، انٹرنل ریونیو سروس، کسٹم، سیلزٹیکس، جعلی رسیداں دے مسلیاں کوں دور کرݨا ہوسی، ساݙی حکومت کوں وی ایہو ڄھیں چیلنجز دا سامݨا اے، ساکوں ٹریک اینڈ ٹریس سسٹم دی کارکردگی بہتر ٻݨاوݨی ہوسی۔ وزیراعظم آکھیا ڄیکر اساں قرض توں نجات ڳھنݨی اے تاں اپݨے محصولات ودھاوݨے ہوسن نتاں قرض ودھدا ویسی اتے آئی ایم ایف توں کݙاھیں چھٹکارا نہ ملسی، نوجوان محنت کرتے محصولات ودھاوݨ کیتے قوم دی تقدیر ٻدلݨ دی ذمہ داری پوری کرن۔ وزیراعظم آکھیا جو انفورسمنٹ کیتے کسٹمز اتے ٻئے اداریاں اچ جدید ٹیکنالوجی متعارف کراوݨی ہوسی، اشیاء دی مس ڈکلیئریشن توں نجات دا انتظام کرݨا ہوسی، سکینر مشیناں منڳواوݨیاں ہوسن۔ وزیراعظم ایف بی آر کوں ہدایت کیتی جو او سرمایہ کاراں، تاجراں اتے ٹیکس ادا کرݨ آلیاں نال چنڳاں سلوک کرن۔
