لاہور۔19اپریل (اے پی پی) وزیر اعظم محمد شہباز شریف آکھیا جو پاکستان اچ سرمایہ کاری کیتے ماحول سازگار اے، جدید ٹیکنالوجی نال معاشی بہتری اتے روزگار دے ودھ موقع مل سڳدن، دوست ملکاں کوں کان کنی سودھے مختلف شعبیاں اچ سرمایہ کاری دے موقع ݙیندے پئیوں۔ پاکستان اچ انفارمیشن ٹیکنالوجی اتے مصنوعی ذہانت دے میدان اچ ٻہوں ٹیلنٹ اے، پاکستان ترقی تے خوشحالی دی راہ تے ویندا پئے۔ اے ڳالھیں انہاں ایکسپو سنٹر اچ ہیلتھ انجینئرنگ اینڈ منرلز شو دی تقریب توں خطاب کریندیں ہوئیں آکھی۔ وفاقی وزیر تجارت جام کمال ،وفاقی وزیر پٹرولیم علی پرویز ملک،چیف ایگزیکٹو (ٹڈاپ) فیض احمد،صدر ایف پی سی سی آئی عاطف اکرام شیخ،تاجر برادری،غیرملکی مندوبین،تجارتی تے اقتصادی ماہرین سودھے ٻئے وی ایں موقع تے موجود ہن۔ وزیر اعظم محمد شہباز شریف آکھیا جو پاکستان اچ سرمایہ کاری دے ٻہوں موقع موجود ہن۔ حکومت اندرونی اتے ٻاہرلے سرمایہ کاراں کوں ساری سہولتاں ݙیوݨ کیتے کوشش کریندی پئی اے۔پاکستان اچ سرمایہ کاری خصوصی طور معدنیات دے شعبے اچ سانجھے منصوبے شروع کرݨ کیتے ملکاں کوں دعوت ݙیندوں۔ انہاں آکھیا جو اڄوکی حکومت دی ݙینھ رات محنت اتے مثبت پالیسیاں پاروں پاکستانی برآمدات ودھدی پئن۔ نمائش اچ 860 غیر ملکی مندوبین شریک تھیے۔ ایں موقع تے کئی ملکاں نال سمجھوتے اتے معاہدیاں تے دستخط وی کیتے ڳئے۔
