اسلام آباد۔21اپریل (اے پی پی) وزیراعظم محمد شہباز شریف رومن کیتھولک چرچ دے پیشوا پوپ فرانسس دی وفات تے افسوس کریندیں ہوئیں آکھیا جو آنجہانی پوپ فرانسس بین المذہبی ہم آہنگی، امن اتے انسانیت دے ودھارے دے علمبردار ہن۔ سنوار کوں وزیر اعظم آفس دے میڈیا ونگ توں جاری بیان موجب وزیراعظم آکھیا جو پاپائے روم ارباں انساناں کوں چنڳائی دی ترغیب، امن تے سلامتی کیتے رہنمائی ݙیندن۔ وزیراعظم آکھیا جو آنجہانی پوپ فرانسس بین المذہبی ہم آہنگی، امن، اتے انسانیت دے فروغ دے علمبردار ہن۔ انہاں دی قیادت اچ کیتھولک چرچ پوری دنیا اچ محبت، تحمل اتے آپسی احترام دے سنیھے کوں عام کیتے۔ وزیراعظم آکھیا جو پوپ فرانسس دا گزریل ݙینھ ایسٹر دے موقع تے غزہ اتے فلسطین اچ فوری جنگ بندی اتے انسانی حقوق دی پامالی روکݨ دا بیان انہاں دی پرامن اتے انسانیت دی محبت نال بھرپور شخصیت کوں نشابر کریندن۔ انہاں دی خدمات یاد رکھی ویسن۔ وزیراعظم آکھیا جو میں حکومت پاکستان اتے پاکستانی عوام ولوں ویٹی کن سٹی، عالمی مسیحی برادری اتے پوری دنیا اچ چاہوݨ آلیاں نال دلی ہمدردی اتے تعزیت کرینداں۔
