اسلام آباد۔22اپریل(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو پاکستان امریکا نال وݙے تکڑے معاشی روابط چاہندے، امریکی کمپنیاں دی سرمایہ کاری کوں خوش آمدید آکھسوں۔ انہاں اے ڳالھ عالمی جریدے بلوم برگ کوں انٹرویو اچ آکھی۔ انہاں آکھیا جو امریکا نال معاشی و تجارتی روابط ودھاوݨ کیتے اساں تعمیری انداز نال اڳو تے ودھسوں، تیکھے ہک سرکاری وفد امریکہ دا دورہ کریسی۔ وزیر خزانہ آکھیا جو پاکستان امریکہ توں ٻئی کپاہ اتے سویا بین مل ڳھنݨ چاہندے، غیر ٹیرف رکاوٹاں مکا تے وی ڳالھ مہاڑ جاری اے تاں جو امریکی مصنوعات کیتے پاکستانی منڈیاں دے در کھل سڳن۔ انہاں آکھیا جو امریکی مصنوعات تے پاکستان اچ کوئی غیر ضروری جانچ پڑتال یا رکاوٹاں ہین تاں ایندا جائزہ ڳھنݨ کوں تیار ہیں، اساں پاکستان اچ امریکی فرماں دی سرمایہ کاری خاص کر کان کنی تے معدنیات دے نویں شعبیاں اچ امریکی سرمایہ کاری دی حوصلہ افزائی کریسوں۔ وزیر خزانہ آکھیا جو حکومت معیشت کوں پائیدار ترقی دی راہ تے سٹݨ دے کم کریندی پئی اے، ترقی کیتے سرمائے دے حصول سانڳے عالمی مالیاتی منڈیاں نال رابطے کریسوں، ملک کوں معاشی اتار چڑھائو دے پھیر اچوں کݙھݨ ترجیح اے، پاکستان بین الاقوامی کیپٹل مارکیٹاں توں فیدہ چاوݨ کیتے اقدامات کریندا پئے، پاکستان ایں سال 200 توں ڳھن تے 250 ملین ڈالر دے پہلے پانڈا بانڈز جاری کریسی۔
