انقرہ۔22اپریل(اے پی پی) وزیراعظم محمد شہباز شریف ترکیہ دے صدر رجب طیب ایردوان دی دعوت تے ݙو ݙینھ دے دورے تے انقرہ پڄ ڳن۔ انقرہ ہوائی اڈے تے ترک وزیر دفاع یشار گیولر، ڈپٹی گورنر انقرہ ظفر اورحان، پاکستان ترکیہ کلچرل ایسوسی ایشن دے صدر برہان قایاترک، پاکستان دے ترکیہ اچ سفیر یوسف جنید، حکومت ترکیہ دے اعلیٰ حکام اتے انقرہ اچ پاکستانی سفارتکاراں انہاں دا استقبال کیتے۔
وزیراعظم شہبازشریف ترک صدر رجب طیب ایردوان نال ملسن اتے ݙو طرفہ تعلقات ٻئے تکڑے کرݨ سودھا اہم علاقائی و عالمی امور تے ڳالھ مہاڑ کیتی ویسی اتے ݙوہیں رہنما مشترکہ پریس کانفرنس وی کریسن۔ وزیر اعظم ترک سرمایہ کاراں اتے کاروباری وفداں نال وی ملسن۔ نائب وزیر اعظم و وزیر خارجہ محمد اسحاق ڈار، وزیر اطلاعات و نشریات عطاء اللہ تارڑ اتے معان خصوصی طارق فاطمی وی وزیر اعظم دے نال ہن۔
