واشنگٹن۔24اپریل (اے پی پی) وفاقی وزیرخزانہ تے محصولات سینیٹرمحمداورنگزیب آکھیا جو پاکستان دی سماجی تے معاشی ترقی کیتے چین، سعودی عرب، اتے متحدہ عرب امارات دی مستقل حمایت لائق تحسین اے، پاکستان اچ اقتصادی اصلاحات دا عمل جاری رہسی، تریمتیں اتے ٻالڑیاں دی تعلیم، مالی شمولیت، کاروباری موقع اتے انہاں کوں بااختیار ٻݨاوݨ حکومت دی پہلی ترجیح اے۔ اے ڳالھیں انہاں گزریل ݙینھ واشنگٹن ڈی سی اچ آئی ایم ایف اتےعالمی بینک دے موسم بہار دے اجلاس دے موقع تے چین، سعودی عرب، یواے ای، ترکیہ دے وزرائے خزانہ، ہالینڈکی ملکہ مکسیما اتے بین الاقوامی مالیاتی اداریاں دے اعلیٰ عہدیداراں نال ملاقاتاں اچ آکھی۔ چین دے وزیر خزانہ لان فوان نال ملاقات اچ وزیرخزانہ پاکستان دی سماجی تے معاشی ترقی کیتے چین دے مستقل حمایت دی تعریف کیتی۔ وزیر خزانہ چینی ہم منصب کوں پاکستان اچٹیکس، توانائی، نجکاری، سرکاری مالیات اتے سرکاری اداریاں اچ کیتی ڳئی اصلاحات دا ݙسیا۔ سعودی عرب دے وزیر خزانہ محمد الجدعان نال ملاات اچ انہاں پاکستان دی اقتصادی ترقی دے پندھ اچ سعودی عرب دی مسلسل حمایت دی تعریف کیتی۔ وزیرخزانہ متحدہ عرب امارات دے وزیر مملکت برائے مالی امور، محمد بن ھادی الحسینی نال ملاقات کیتی۔ انہاں متحدہ عرب امارات دے ہم منصب کوں پاکستان دے معاشی اشاریے، کریڈٹ ریٹنگ دی بین الاقوامی ایجنسی فِچ ولوں پاکستان دی خودمختار کریڈٹ ریٹنگ اچ بہتری، اتے حکومت دے نجکاری دے ایجنڈے بارے ݙسیا۔ ایشین انفراسٹرکچر انویسٹمنٹ بینک دے صدر جن لیکون نال ملاقات اچ وزیر خزانہ پاکستان دی سماجی و معاشی ترقی کیتے بینک دے تعاون دا شکریہ ادا کیتا۔ وزیرخزانہ ایس اینڈ پی گلوبل دی ٹیم نال وی ملاقات کیتی۔
