اسلام آباد۔24اپریل(اے پی پی)وفاقی وزیر برائے منصوبہ بندی، ترقی واصلاحات اتے خصوصی اقدامات پروفیسر احسن اقبال بھارت دے پاکستان تے بے بنیاد الزامات دی شدید مذمت کریندے آکھیے جو اے اقدامات بھارت دی ہک منظم مہم دا حصہ ہین جو مقبوضہ جموں و کشمیر اچ جاری انسانی حقوق دی بدترین خلاف ورزیاں توں عالمی توجہ ہٹائی ونڄے اتے پاکستان دے خلاف اپݨے مذموم تکڑے کریڄن۔ انہاں آکھیا جو انہاں اقدامات دا مقصد بھارتی حکومت دی اندرونی ناکامیاں اتے کشمیری عوام تے ودھدے مظالم توں توجہ ہٹاوݨ وی اے۔ انہاں آکھیا جو پاکستان دہشت گردی دے خلاف ودھ قربانیاں ݙتن، ہزاراں جاناں وارین اتے ارباں ڈالر دا معاشی نقصان چاتے، ایندے باوجود پاکستان ڄڳ اچ ہک پُرامن، ذمہ دار اتے ترقی پسند ریاست دی سنڄاݨ ٻݨائی اے۔ انہاں سندھ طاس معاہدے کوں یکطرفہ سبوتاژ کرݨ دی کوشش تے چنتا کریندے آکھیے جو اے ہک بین الاقوامی معاہدہ اے جیندے تے بھارت دی بدنیتی نال کوئی سمجھوتہ نہ کیتا ویسی، پاکستان اپݨے پاݨی دے حقوق دے تحفظ کیتے ہر ممکن اقدام کریسی۔ عالمی برادری بھارت دیاں گمراہ کن چالاں کوں ڄاݨدے ہوئے امن کیتے کردار ادا کرے۔
