اسلام آباد۔25اپریل (اے پی پی) وزیرِ اعظم محمد شہباز شریف پی آئی اے دی نجکاری اچ شفافیت اتے مجوزہ معینہ مد اچ نجکاری یقینی ٻݨاوݨ دی ہدایت کیتی اے۔ جمعے کوں وزیراعظم آفس دے میڈیا ونگ توں جاری بیان موجب اے ڳالھ انہاں آپݨی صدارت اچ پاکستان انٹرنیشنل ایئرلائنز (PIA) دی نجکاری تے جائزہ اجلاس اچ ݙتی۔ اجلاس اچ وفاقی وزرا خواجہ محمد آصف، احد خان چیمہ، عطاء اللہ تارڑ، اٹارنی جنرل منصور اعوان، مشیران محمد علی، سید توقیر شاہ، وزیرِ مملکت بلال اظہر کیانی، معاون خصوصی ہارون اختر، نیشنل کوارڈینیٹر خصوصی سرمایہ کاری سہولت کونسل لیفٹیننٹ جنرل سرفراز احمد اتے متعلقہ اعلی حکام شریک تھیے۔ اجلاس اچ وزیراعظم کوں نیلامی دے طریقہ کار،درکات مدت اتے نیلامی اچ شرکت کیتے شرائط دا ݙسیا ڳئیا۔ وزیراعظم پی آئی اے دی نجکاری اچ شفافیت کوں اہمیت ݙیوݨ اتے نجکاری مجوزہ مد اچ یقینی ٻݨاوݨ دی ہدایت کیتی۔ وزیراعظم پی آئی اے دی نجکاری کیتے روڈ شو اتے سرمایہ کاراں کوں مکمل اعتماد اچ ڳھنݨ دی ہدایت کیتی۔ وزیراعظم آکھیا جو پی آئی اے دی نجکاری دے طریقہ کار اچ شفافیت کوں اہمیت ݙتی ونڄے۔ وزیراعظم آکھیا جو شفافیت یقینی ٻݨاوݨ کیتے، پی آئی اے سودھے ساری سرکاری کمپنیاں دی نجکاری آئندہ براہ راست ٹیلی ویژن اتے ڈیجیٹل پلیٹ فارمز تے نشر کیتی ویسی۔ اجلاس اچ ݙسیا ڳئیا جو انویسٹر آؤٹ ریچ کیتے کنسلٹنٹ نال رَل تے ہک جامع سٹریٹجی ٻݨائی ڳئی اے اتے ایندا پورا عملدرآمد تھیندا پئے۔
