اسلام آباد۔25اپریل(اے پی پی)پہلگام فالس فلیگ واقعہ دی ہندوستانی پولیس سٹیشن اچ دائر ایف آئی آر مودی حکومت دا کوڑ بے نقاب کرݙتے اتے حملے کوں مشکوک ٻݨا ݙتے۔ سیکیورٹی ذرائع ݙسائے جو پہلگام پولیس سٹیشن جائے وقوع توں 6 کلومیٹر پریں ہے ٻھل ایں سانڳے کٹی ڳئی ایف آئی آر ہندوستان دے فالس فلیگ آپریشن دا پردہ چاک کرݙتے۔ ایف آئی آر موجب پہلگام حملہ ݙینھ ہک وڄ تے 50 منٹ توں 2 وڄ تے 20 منٹ تئین جاری رہے اتے حیران کن طور تے صرف 10 منٹ اچ 2 وڄ تے 30 منٹ تے ایف آئی آر درج کر ڳھدی ویندی اے، صرف 10 منٹ اچ ہی ایف آئی آر درج تھیوݨ ہک ڳھڑے ڳھڑائے منصوبے دا اشارہ ݙیندے، ہک طے شدہ منصوبے دے تحت سرحد پار توں نامعلوم دہشتگرد نامزد کر ݙتے ویندن، مبینہ دہشت گرداں اندھا دھند فائرنگ کیتی ڄݙاں جو بھارتی حکومت اتے میڈیا ایکوں ٹارگیٹڈ کلنگ دا کوڑا راگ رسائی رہے۔ سیکیورٹی ذرائع موجب واقعہ دے 10 منٹ اچ درج کیتی ونڄݨ آلی ایف آئی آر اچ “بیرونی آقاؤں کی ایماء پر” ڄھیں الفاظ پہلے توں رلائے ویندن، ایف آئی آر نال مودی حکومت دا پہلگام فالس فلیگ دا بھونڈا ڈرامہ ٻہوں گندا بے نقاب تھی چکیے، ایف آئی آر اچ کوڑ پکڑیڄݨ دے بعد مودی دا پہلگام فالس فلیگ ڈرامہ صرف ہک مذاق ٻݨ چکیے۔
