اسلام آباد۔27اپریل(اے پی پی)وفاقی وزیر اطلاعات و نشریات عطاء اللہ تارڑ آکھیے جو نے پہلگام واقعہ تے پاکستان دا موقف واضح اے، امن دی خواہش کوں ساݙی کمزوری نہ سمجھیا ونڄے، پاکستان اپݨی سالمیت و خودمختاری دا دفاع کرݨ ڄاݨدے، بھارت کوں مہم جوئی دا تکرا ولدا ݙتا ویسی۔ اسلام آباد اچ غیر ملکی میڈیا نمائندگان کوں پہلگام واقعہ تے بریفنگ ݙینے انہاں آکھیا جو پاکستان آپ سب توں ودھ دہشت گردی توں متاثرہ ملک اے،اساں دہشت گردی دے خلاف فرنٹ لائن اسٹیٹ ہیں اتے پاکستان دہشت گردی دے خلاف جنگ دا ٻھوڳ ٻھڳیندا پئے، ساݙیاں مسلح افواج، قانون نافذ کرݨ آلے ادارے، پولیس، رینجرز، عام شہری اتے سول سوسائٹی دہشت گردی دی جنگ اچ وݙیاں قربانیاں ݙتن ڄیڑھیاں پاکستان اتے عالمی امن کیتے ہین۔ وفاقی وزیر اطلاعات آکھیا جو پاکستان ہمیشہ دہشت گرد گروپاں اتے دہشت گرداں دے خلاف کارروائی کیتی اے، اساں روزانہ دی بنیاد تے اے ذمہ داری نبھیندے پئے ہیں، خیبر پختونخوا، بلوچستان اچ صورتحال اتے ہݨ دا جعفر ایکسپریس سانحہ سب دے سامݨے اے ٻھل ساݙی سیکورٹی فورسز دہشت گرداں دا بہادری نال مقابلہ کیتے ٻھل ساݙے مشرق اچ پڑوسی ملک جعفر ایکسپریس واقعہ دی مذمت کیوں نئیں کیتی؟ اے کیوں تھیندے جو ڄݙاں وی پاکستان دہشت گردی دا سامنا یا دہشت گرداں دا مقابلہ کریندے، ساݙے بے گناہ شہریاں اتے مسلح افواج دے افسران و جواناں دا خون واہندے تاں مشرقی ہمسایہ ایندے تے خوشیاں منیندے، ایندی کای وجہ اےَ؟ بھارت آپ ریاستی سطح تے دہشت گردی اچ ملوث اے، ڄیکر اساں کلبھوشن یادیو کوں نا پکڑیا ہوندا تاں اے حقیقت شاید ہی سامݨے آندی، دہشت گرداں کوں ساݙی مشرقی سرحد توں فنڈنگ، اسلحہ اتے گولہ بارود ملدے، ایہا وجہ اے جو دہشت گرد حملہ کریندن تاں ساݙا مشرقی ہمسایہ ایندی مذمت نئیں کریندا۔ انہاں آکھیا جو کینیڈا اتے امریکہ سودھا پورے ڄڳ اچ سکھ رہنماواں دے قتل، اقلیتاں تے مظالم اچ ملوث ریاست ساݙے تے کیویں الزامات لا سڳدی اے؟ پاکستان اچ دہشت گردی واقعات اچ بھارت دے ملوث ہووݨ دے ناقابل تردید ثبوت موجود ہین، پہلگام واقعہ پاکستان دی مغربی علاقیاں اچ دہشت گرداں دے خلاف کامیابیاں توں توجہ ہٹاوݨ دی کوشش لڳدے، اے واقعہ انہاں کامیابیاں توں توجہ ہٹاوݨ دی کوشش تھی سڳدے، ڄݙاں پہلگام دا علاقہ ساݙی سرحد توں 150 کلو میٹر توں وی پریں ہے تاں ایندا الزام پاکستان تے کیوں لڳدے؟ کیا بھارت کولو کوئی قابل اعتماد شواہد ہین؟ کیا کوئی اینڄھا موقف اے ڄیڑھا شواہد نال ثابت تھیوے؟ واقعہ دے 10 منٹ بعد ایف آئی آر درج تھیوݨ ثبوت اے جو اے سازش پہلے توں تیار ہئی۔ انہاں لندن اچ پاکستانی سفارت خانہ تے حملہ بھارتی حکومت دی انتہاء پسندانہ سوچ دی عکاسی قرار ݙیندے آکھیے جو بھارتی دہشت گردی تے پوری پاکستانی قوم متحد اتے یک زبان اے، بھارت دی کہیں وی مہم جوئی یا پاݨی روکݨ دی کوشش دا تکڑا ولدا ݙتا ویسی، عالمی قوانین دے مطابق سندھ طاس معاہدہ یکطرفہ ختم نئیں کیتا ونڄ سڳدا، این پورے ڈرامہ اچ پاکستان انتہائی ذمہ داری ݙکھائی اے جو اساں عالمی امن، علاقائی سلامتی اتے امن چاہندے ہیں، ایں صورتحال اچ پاکستان پہلگام واقعے دی غیر جانبدارانہ و شفاف تحقیقات اچ پورا تعاون کریسی۔ وفاقی وزیر اطلاعات آکھیے جو پاکستان ساری صورتحال تے سفارتی محاذ تے ڳالھ مہاڑ کیتی اے اتے دوست ملکآں کوںس اری حقیقت کھول ݙتی اے، پاکستان ہمسایہ ملکاں نال پرامن اتے چنڳے تعلقات چاہندے۔ انہاں آکھیا جو دہشتگردی دے خلاف پاکستان دیاں کوششاں عالمی سح تے منیاں ڳن، پہلگام ڈرامہ تے بھارت کوں کہیں وی وی حمایت نئیں ملی ٻھل پاکستان ودھ ذمہ داری ݙکھیندے ہوئے پہلگام واقعہ اچ غیر جانبدارانہ تحقیقات دی پیشکش کیتی اے۔
