اسلام آباد۔28اپریل(اے پی پی) نائب وزیراعظم / وزیر خارجہ سینیٹر محمد اسحاق ڈار آکھیے پاکستان سندھ طاس معاہدے دے تحت اپݨے جائز حصے دا پاݨی محفوظ بݨاوݨ سانڳے سارے ضروری اقدامات کریسی، معاہدے کوں معطل کرݨ دی کوشش دا بھارت دا یکطرفہ اتے غیرقانونی اقدام بین الریاستی تعلقات دے قواعد، بین الاقوامی قانون اتے خود معاہدے دی شقاں دے منافی اے۔ ترجمان دفتر خارجہ توں جاری بیان موجب اے ڳالھ نائب وزیراعظم / وزیر خارجہ سینیٹر محمد اسحاق ڈار سندھ طاس معاہدے دے حوالے نال ھک اہم اعلی سطحی اجلاس دی صدارت کریندے آکھی جئیں دا پس منظر بھارت دی طرفوں معاہدے کوں معطل کرݨ دی کوشش ہئی ۔اجلاس اچ وزیر قانون و انصاف، وزیر آبی وسائل، اٹارنی جنرل، سینئر حکام اتے تکنیکی ماہرین شرکت کیتی۔ نائب وزیراعظم / وزیر خارجہ زور ݙتے جو پاکستان سندھ طاس معاہدے دے تحت آپݨا جائز حصے دا پاݨی محفوظ بݨاوآݨآ سانڳے سارے ضروری اقدامات کریسی ۔ انہاں واضح کیتے جو معاہدے کوں معطل کرݨ دی کوشش دا بھارت دا یکطرفہ اتے غیر قانونی اقدام بین الریاستی تعلقات دے قواعد، بین الاقوامی قانون تے خود معاہدے دی شقاں دے منافی اے۔ انہاں ایں ڳالھ تے زور ݙتے جو اے معاہدہ خطے دے استحکام سانڳے ٻہوں اہم اے تے ایندے تقدس کوں برقرار رکھݨ ضروری اے۔ انہاں آکھیے سندھ طاس دا آبی نظام پاکستان دے 24 کروڑ عوام سانڳے زندگی دی علامت اے اتے بھارت دی طرفوں پاݨی کوں ہتھیار بݨاوݨ دی کوشش افسوسناک اے۔ انہاں اعادہ کیتے جو پاکستان اپݨے آبی حقوق دے تحفظ اتے عوامی بہبود سانڳے معاہدے دے مکمل نفاذ دی حمایت جاری رکھیسی۔
