اسلام آباد۔28اپریل(اے پی پی) وفاقی وزیر اطلاعات و نشریات عطاء اللہ تارڑ بھارت دی طرفوں پاکستانی ٹی وی چینلز اتے ٻہوں سارے صحافیاں و اینکر پرسنز دے یوٹیوب چینلز کوں بھارت اچ بند کرݨ دے اقدام تے ملکی میڈیا اداریں، صحافیاں اتے اینکر پرسنز نال ٹیلیفونک رابطہ کیتے تے قومی بیانیہ دے موثر دفاع اتے بھارتی پروپیگنڈے دے خلاف پاکستان دے موقف کوں دنیا دے سامݨے مدلل انداز اچ پیش کرݨ تے انہاں کوں خراج تحسین پیش کیتے۔ انہاں آکھیے بھارتی حکومت اپݨی شرمندگی تے خفت لکاوݨ سانڳے پاکستانی چینلز تے پابندیاں لاتن لیکن انھاں اقدامات توں حقائق دبائے ونڄ سڳدن نہ ہی پاکستان دا موقف دنیا توں لُکایا ونڄ سڳدے ۔ عطاء اللہ تارڑ آکھیے بھارت دا بیانیہ عالمی سطح تے مکمل طور تے ناکام تھی چکیے جݙاں جو پاکستانی میڈیا موجودہ صورتحال اچ پیشہ ورانہ مہارت، ذمہ واری اتے حب الوطنی دا مظاہرہ کریندے مثالی کردار نبھائے ، انہاں آکھیے پاکستانی میڈیا بھارتی پروپیگنڈے دا موثر جواب ݙتے تے عالمی برادری دے سامݨے پاکستان دا موقف واضح انداز اچ پیش کیتے جئیں تے او خراج تحسین دے مستحق ہن ۔ وفاقی وزیر اطلاعات آکھیے حکومت پاکستان انھاں میڈیا اداریں تے صحافیاں دی مکمل حمایت جاری رکھیسی جیڑھا جو قومی وقار کوں اُچا کرݨ تے بیانیے دے ودھارے اچ آپݨا کردار نبھیندے پئن ،۔ انہاں آکھیے حکومت ہر ایں آواز دی حوصلہ افزائی کریسی جیڑھی ملک دی سالمیت، وقار اتے قومی بیانیے دی ترویج اچ معاون ہووے۔ عطاء اللہ تارڑ زور ݙتے جو بھارتی حکومت دا پاکستانی ٹی وی چینلز اتے یوٹیوب پلیٹ فارمز تے قدغن لاوݨ صحافت دے عالمی اصولاں دی صریحاً خلاف ورزی اے۔ انہاں آکھیے حکومت پاکستان ایں معاملے کوں متعلقہ بین الاقوامی فورمز تے وی چیسی تاں جو دنیا بھارتی قدغناں توں آگاہ تھی سڳے ۔ وفاقی وزیر آکھیے پاکستانی میڈیا حالات دی نزاکت کوں مدنظر رکھیندے ہوئیں قومی مفادات کوں ترجیح ݙتی تے انتہائی متوازن اتے ذمہ دارانہ رپورٹنگ دی مثال قائم کیتی۔ انہاں آکھیے پاکستانی صحافیاں اتے اینکر پرسنز پیشہ ورانہ دیانتداری نال اپݨی ذمہ واریاں نبھائن اتے انہاں دی خدمات کوں سنہری حروف اچ لکھیا ویسی۔
