اسلام آباد۔29اپریل (اے پی پی) وفاقی وزیر برائے صحت مصطفیٰ کمال چین اچ تھیوݨ آلے انٹرنیشنل میڈیکل اینڈ انوویشن سنٹر دے کنونشن اچ پاکستان دی نمائندگی کریندیں ہوئیں چینی دواساز اتے طبی آلات ٻݨاوݨ آلی کمپنیاں پاکستان اچ پیداواری یونٹس ٻݨاوݨ دی دعوت ݙتی۔ انہاں آکھیا جو پاکستان اچ سرمایہ کاری دے ٻہوں موقع موجود ہن اتے حکومت غیر ملکی سرمایہ کاراں کوں ہر سہولت ݙیندی پئی اے۔ کنونشن اچ چین دی اعلیٰ قیادت، شنگھائی تعاون تنظیم دے سیکرٹری جنرل، بیلاروس دے نائب وزیر اعظم، رکن ملکاں دے وزرائے صحت اتے طبی ماہرین شریک تھیے۔ افتتاحی تقریب دے بعد مندوبین طبی آلات اتے جدید ٹیکنالوجی دی نمائش دا دورہ وی کیتا۔ وزیر صحت مصطفیٰ کمال پاکستان اچ جاری ٹیلی میڈیسن منصوبیاں تے روشنی پاتی اتے آکھیا جو پرائمری اتے سیکنڈری ہیلتھ کیئر وچال فرق ختم کرݨ کیتے ٹیلی میڈیسن موثر حل اے۔ انہاں ݙسیا جو پاکستان ہک نویں منصوبے تے کم کریندا پئے جئیں دے تحت شہریاں دے طبی ریکارڈ کوں نادرا دے شناختی کارڈ نال جوڑ تے اتے ڈیٹا دی مدد نال وزارت صحت عامہ دی ودھ موثر پالیسیاں ٻݨیسی جئیں نال بیماریاں دی پیش بندی اتے علاج ممکن تھیسی۔
