اسلام آباد۔29اپریل (اے پی پی) وزیراعظم محمد شہبازشریف آکھیا جو آئی ٹی دے شعبے اچ ٻاہرلے سرمایہ کاراں کوں سہولتاں ݙٰسوں، شعبے اچ ستر کروڑ ڈالر دی سرمایہ کاری نینگراں دی صلاحیتاں کوں اجاگر کرݨ اچ معاون ثابت تھیسی۔ مصنوعی ذہانت اتے آئی ٹی اچ نینگراں دی تعلیم تے تربیت دا وݙا منصوبہ ٻݨایا ڳئے۔ زراعت ، صنعت ، برآمدات اتے ٻئے شعبیاں اچ آئی ٹی اتے اے آئی توں فیدہ چاتا ویندا پئے۔ منگل کوں تھیوݨ آلی ڈیجیٹل فارن ڈائریکٹ انویسٹمنٹ کانفرنس توں خطاب کریندیں ہوئیں وزیراعظم پوری دنیا توں ڈیجیٹل مندوبین دا کانفرنس اچ خیرمقدم کریندیں ہوئیں آکھیا جو 11 توں ودھ دوست ملکاں دے آئی ٹی وزرا ، ڈپٹی وزرا اتے آئی ٹی ماہرین کوں پاکستان آوݨ تے خوش آمدید آکھدوں۔ وزیراعظم آکھیا جو ڈیجیٹل دنیا اچ اڄ سارے شعبیاں اچ غیر معمولی اثر رکھیندی اے۔ ݙو ݙہاکیاں دی نسبت اڄ دی ڈیجیٹل دنیا بدل ڳئی اے۔ اساں پنجاب اچ آپݨی وزارت اعلیٰ دے دور اچ میرٹ تے نینگراں اچ چار لکھ لیپ ٹاپ ݙتے۔ ورلڈ بینک دے پروگرام دے تحت دیہی معیشت خصوصی طور ایگریکلچرسٹ کوں ڈیجیٹائز کیتا ڳئے۔ وزیراعظم آکھیا جو پاکستان دی سٹھ فیصد آبادی نینگراں تے مشتمل اے جو ڈیجٹل دنیا اچ دستیاب وݙے موقعیاں توں فیدہ چا سڳدی اے۔ وزیراعظم آکھیا جو مارچ اچ 4 ارب 10 کروڑ ڈالر دی ترسیلات زر پاکستان ٻھجوائی ڳئن جو پاکستان دی تاریخ دا ہک ریکارڈ اے۔ انہاں آکھیا جو کانفرنس دے تعاون اتے رہنمائی نال اساں ایں قابل تھی ویسوں جو آئی ٹی دے شعبے اچ دنیا اچ نشابر ڄاہ ڳھن سڳوں۔ اساں پہلے توں ایں شعبے اچ وݙے پیمانے تے وفاقی اتے صوبائی سطح تے آئی ٹی پارکس ، انکیوبیشن سنٹر ، تحقیق تے ترقی دے مراکز اتے تربیت سودھے مختلف منصوبیاں تے عمل کریندے پئیوں۔ چین دی کمپنی ہواوے نال رَل تے سالانہ ݙو لکھ طلبا تے طالبات کوں ہنرمندی دی تعلیم ݙیندے پئیوں۔ انہاں سارے سرمایہ کارآں اتے نارتھ امریکا سودھے ٻئی کمپنیاں کوں دعوت ݙتی جو او زراعت کوں جدید ٹیکنالوجی تے کرݨ، برآمدات ودھاوݨ، صنعت دے ودھارے اتے پاکستان اچ مفید روزگار کوں ودھاوݨ بارے اساݙے نال رَل تے کم کروں۔ وزیراعظم ایں موقع تے پاکستان اچ آپݨے روسی سانجھے داراں دے رَلے پنڄاہ کروڑ ڈالر دی سرمایہ کاری کرݨ دا اعلان آلے پاکستان کوں خراج تحسین پیش کیتا۔ انہاں ڈیجیٹل کوآپریشن آرگنائزیشن دی سیکرٹری جنرل دیماالیحییٰ سودھے ٻئے مزماناں دا خصوصی شکریہ ادا کیتا۔ وزیراعظم آکھیا جو غیر متزلزل کوششاں نال پاکستان آئی ٹی دے شعبے اچ دنیا دی صف اچ کھڑا تھیسی۔
