اسلام آباد۔29اپریل(اے پی پی) وزیراعظم محمد شہباز شریف آکھیے پاکستان تے قزاخستان وچال تجارتی رابطے استوار کرݨ ساݙی ترجیح اے ،ریل لنک منصوبہ پورے علاقے سانڳے گیم چینجر ثابت تھیسی جیڑھاجو وسطی ایشیائی ریاستاں کوں گوادر پورٹ نال جوڑیسی ۔وزیراعظم دفتر دے میڈیا ونگ توں جاری بیان موجب انہاں اے ڳالھ قزاخستان دے وزیر ٹرانسپورٹ مرات کاراباییو کوں آکھی جنہاں وزیراعظم نال ملاقات کیتی ۔وزیراعظم قزاخستان دے صدر قاسم جومارت توکایف سانڳے نیک خواہشات دا اظہار کیتے۔وزیراعظم آکھیے قزاخستان دے صدر نال سعودی عرب اچ ورلڈ واٹر سمٹ دے دوران ملاقات ٻہوں نتیجہ خیز رہی ۔ وزیراعظم گزریل سال آپݨے دورہ قزاخستان دا وی ذکر کیتے۔ انہاں آکھیے قزاخستان دے صدر دے دورہ پاکستان دے منتظر ہیسے ،قزاخستان دے صدر دے دورہ پاکستان کوں نتیجہ خیز بݨاوݨ سانڳے حکمت عملی تے تکھی رفتار نال کم کیتا ویسی ،پاکستان تے قزاخستان وچال ریل لنک دے حوالے نال فیزیبلیٹی تے کم شروع کیتا ویسی ۔ وزیراعظم آکھیے پاکستان اتے قزاخستان وچال ریل لنک پورے علاقے سانڳے ھک گیم چینجر منصوبہ ثابت تھیسی جیڑھا جو وسطی ایشیائی ریاستاں کوں گوادر پورٹ نال جوڑیسی ،ریل لنک فزیبیٹی اتے تکنیکی معاملات دے حوالے نال ھک وفد وختی قزاخستان دا دورہ کریسی ،قزاخستان پاکستان اچ مارشل آرٹس اتے شطرنج دے ودھارے اچ ماہرانہ کردار ادا کرسڳدے ۔ وزیراعظم آکھیے ݙوہیں ملکاں وچال تعلیم دے شعبے اچ تعاون دی بے پناہ استعداد موجود اے ، قزاخستان دی یونیورسٹیاں دے پاکستان اچ کیمپسز کھولݨ دے حوالے نال موقع موجود ہن ،قزاخستان تے پاکستان وچال براہ راست ہوائی رابطے دے حوالے نال پی آئی اے لائحہ عمل بݨاوے ،ݙوہیں ملکاں وچال بزنس ٹو بزنس تعلقات استوار کرݨ ساݙی ترجیح اے ۔ملاقات اچ زراعت، معیشت، تجارت، سرمایہ کاری، آئی ٹی اتے مواصلات دے شعبیں اچ تعاون مزید تکڑا کرݨ تے ڳالھ مہاڑ کیتی ڳئی۔ قزاخستان دےوزیر ٹرانسپورٹ پاکستان اچ پرتپاک استقبال اتے میزبانی تے وزیراعظم دا شکریہ ادا کیتے۔ انہاں آکھیے قزاخستان دی تاجر برادری و سرمایہ کاراں پاکستان نال بزنس ٹو بزنس تعلقات بݨاوݨ دے حوالے نال گھاٹی دلچسپی ڳھدی اے ،پاکستان ھک تکھے ابھردی ہوئی مارکیٹ اے،کراچی اتے گوادر دی بندرگاہواں دی قزاخستان سانڳے ٻہوں زیادہ اہمیت اے ایں حوالے نال الماتے توں گوادر تئیں ریل لنک اساں سانڳے ٻہوں ضروری اے ،پاکستان اتے قزاخستان مشترکہ بین الوزارتی کمیشن دے 13ویں اجلاس اچ 10 شعبیں اچ تعاون دے حوالے نال فریم ورک تے دستخط تھئن۔ ایں توں انڄ معاشی تعلقات اچ مضبوطی، اطلاعات اتے ثقافت، ٹیکسٹائل تے معدنیات دے شعبیں اچ کئی مفاہمتی یادداشتاں تے وی دستخط تھئن ۔ انہاں آکھیے قزاخستان دی تاجر برادری تے سرمایہ کاراں دا ھک وفد وی پاکستان دے دورے تے ہے۔ وفد کراچی اتے گوادر دی بندرگاہواں دا دورہ وی کیتے۔ کاروباری وفد دی کراچی اچ بی ٹو بی ملاقاتاں تھئن۔ملاقات اچ وفاقی وزیر مواصلات عبد العلیم خان، وفاقی وزیر اقتصادی امور احد خان چیمہ ، وفاقی وزیر اطلاعات و نشریات عطاء اللہ تارڑ ، وفاقی وزیر ریلوے حنیف عباسی ، وزیراعظم دے معاون خصوصی طارق فاطمی اتے متعلقہ اعلیٰ سرکاری افسر موجود ہن۔
