اسلام آباد۔29اپریل(اے پی پی) وزیراعظم محمد شہباز شریف سندھ طاس معاہدے دے حوالے نال بھارت دے غیر قانونی و غیر ذمہ دارانہ اقدامات کوں ناقابل قبول قرار ݙیندے آکھیے سندھ طاس معاہدے دے تحت ملݨ آلا پاݨی 240 ملین لوکاں دی لائف لائن اے، بھارت دی کہیں وی مہم جوئی تے پاکستان اپݨی خودمختاری تے علاقائی سالمیت دا پوری طاقت نال دفاع کریسی۔ وزیراعظم دفتر دے میڈیا ونگ توں جاری بیان موجب وزیراعظم اقوام متحدہ دے سیکرٹری جنرل انتونیو گوتیرس کوں ٹیلی فون تے اے ڳالھ آکھی اے۔ وزیراعظم محمد شہبازشریف تے اقوام متحدہ دے سیکرٹری جنرل انتونیو گوتیرس وچال ٹیلی فون تے تھیوݨ آلی ڳالھ مہاڑ اچ بالخصوص جنوبی ایشیا دی اڄوکی صورتحال تے ڳالھ مہاڑ کیتی ڳئی۔ وزیراعظم سیکرٹری جنرل کوں پاکستان دی دہشت گردی دے خلاف عالمی جنگ اچ بے بہا قربانیاں دا ذکر کریندے آکھیے پاکستان دہشت گردی دی ساری شکلاں اتے مظاہر دی مذمت کریندے ۔ پاکستان دے خلاف بھارتی الزامات کوں بے بنیاد قرار ݙیندے وزیراعظم پاکستان کوں پہلگام واقعہ نال جوڑݨ دی کہیں وی کوشش کوں ݙوٹوک الفاظ اچ مسترد کیتے تے واقعہ دی شفاف اتے غیر جانبدارانہ تحقیقات دے اپݨے مطالبے دا اعادہ کیتے۔ وزیراعظم کشمیریاں دی جدوجہد آزادی کوں غیر قانونی قرار ݙیوݨ دی ہندوستان دی کوششاں نال ہندوستان دے غیر قانونی طور تے مقبوضہ جموں و کشمیر اچ ایں دی وسیع پیمانے تے ریاستی سرپرستی اچ دہشت گردی تے شدید تشویش کیتی ۔ انہاں خاص طور تے سندھ طاس معاہدے دے حوالے نال بھارت دے غیر قانونی و غیر ذمہ دارانہ اقدامات کوں ناقابل قبول قرار ݙیندے آکھیے سندھ طاس معاہدے دے تحت ملݨ آلا پاݨی 240 ملین لوکاں دی لائف لائن اے۔ وزیراعظم ایں ڳالھ تے زور ݙتے جو بھارت دی طرفوں کہیں وی مہم جوئی دی صورت اچ پاکستان اپݨی خودمختاری اتے علاقائی سالمیت دا پوری طاقت نال دفاع کریسی ۔ وزیراعظم اقوام متحدہ دے سیکرٹری جنرل تے زور ݙتے جو او بھارت کوں ذمہ داری نال کم گھنݨ تے تحمل دا مشورہ ݙیون۔ وزیراعظم جموں و کشمیر دے حل طلب مسئلہ کوں جنوبی ایشیا اچ عدم استحکام دی بنیادی وجہ قرار ݙیندے اقوام متحدہ دے سیکرٹری جنرل تے زور ݙتے جو او اقوام متحدہ دی سلامتی کونسل دی متعلقہ قرارداداں موجب ایں دے منصفانہ حل سانڳے آپݨا کردار نبھاون۔ وزیراعظم بین الاقوامی برادری دے ذمہ دار رکن اتے اقوام متحدہ دی سلامتی کونسل دے غیر مستقل رکن دی حیثیت نال بین الاقوامی امن اتے سلامتی کوں ودھارا ݙیوݨ سانڳے پاکستان دے غیر متزلزل عزم دا اعادہ کیتے۔ اقوام متحدہ دے سیکرٹری جنرل جنوبی ایشیا اچ امن سانڳے پاکستان دی کوششاں کوں دی تعریف کریندے آکھیے دنیا اہم ویلھے اچ خطے اچ کہیں قسم دی کشیدگی دی متحمل نی تھی سڳدی۔(
