مودی دا جنگ دا بیانیہ ٻہوں خطرناک اتے غیر ذمہ دارانہ اے، مراد علی شاہ

کراچی۔ 04 مئی (اے پی پی) وزیرِاعلیٰ سندھ سید مراد علی شاہ آکھیے جو پاکستان ہک پرامن ایٹمی طاقت اے اتے علاقائی و عالمی امن کیتے آپݨے عزم تے قائم رھسی۔ جاری اعلامیہ موجب ہک نجی ٹی وی چینل کوں انٹرویو ݙیندے مراد علی شاہ شہید ذوالفقار علی بھٹو کوں خراجِ عقیدت پیش کیتا اتے آکھیے جو انہاں دی بدولت پاکستان ایٹمی صلاحیت حاصل کرݨ وچ کامیاب تھیا۔ انہاں آکھیا ایٹمی طاقت ہووݨ دے باوجود پاکستان ہمیشہ امن دا پرچار کیتے۔ مراد علی شاہ بھارتی وزیرِاعظم نریندر مودی دی طرفوں اڄوکے پہلگام واقعے تے پاکستان تے لاتے ڳئے بے بنیاد اتے کوڑے الزامات کوں سختی نال مسترد کریندے شدید تنقید کیتی۔ انہاں آکھیا جو کوئی وی ذمہ وار ملک ایٹمی جنگ جیھے تصورات دی سوچ وی نئیں رکھیندا اتے ایجھا بیانیہ ٻہوں خطرناک اتے غیر ذمہ دارانہ اے۔ انہاں مزید آکھیا جو پہلگام ڈرامے دے بعد پاکستان شفاف تحقیقات دی پیشکش کیتی اتے ہݨ بھارت آپݨے جال وچ پھس چکیے۔ بھارت کنے کوئی رستہ نی بچیا اتے او فیس سیونگ دی ڳول اچ ناکام تھی چکیے ۔ ایندا پروپیگنڈہ خراب طریقے نال ناکام تھی ڳیے۔ وزیرِاعلیٰ پاکستان دی سفارتی کوششاں دی تعریف کیتی تے آکھیے ڈپٹی وزیرِاعظم بین الاقوامی برادری دے سامݨے پاکستان دا مؤقف مؤثر انداز وچ پیش کیتے۔ انہاں چیئرمین بلاول بھٹو زرداری دی وی تعریف کیتی جنہاں بھارت کوں واضح اتے ݙو ٹوک جواب ݙتے۔ انہاں دا آکھݨ ہا بھارت ماضی وچ وی ایجھیاں حرکتاں کریندا رہیے لیکن ایں واری ایندیاں چالاں ناکام تھی ڳئن۔ سندھ طاس معاہدے تے ڳالھ کریندے مراد علی شاہ زور ݙتے جو بھارت یکطرفہ طور تے ایں معاہدے کوں معطل نی کر سڳدا۔ انہاں خبردار کیتے جے بھارت پاکستان دا پاݨی بند کرݨ دی کوشش کیتی تاں اینکوں جنگی اقدام سمجھیا ویسی۔ وزیرِاعلیٰ بین الصوبائی پاݨی دے جھیڑے دے حل وچ بلاول بھٹو زرداری دے کردار کوں اجاگر کریندے آکھیے بلاول دی کوششاں دی بدولت صوبیاں وچال پاݨی متعلق مسئلے حل تھی چکئن۔ پاکستان دے مؤقف کوں دہریندے انہاں آکھیا جو اساں ہک پرامن قوم ہیسے لیکن اساں کوں آپݨے وطن دا دفاع کرݨ وی آندے۔ پاکستانی قوم آپݨی مسلح افواج دے مونڈھے نال مونڈھا جوڑ تے کھڑی اے۔ جݙاں وی ملک کوں بحران دا سامݨا تھیا عوام ہمیشہ ثابت قدمی ݙکھائی اے۔ وزیرِاعلیٰ چھیکڑ وچ ݙسایا جو قومی اسمبلی دا اجلاس کل سݙیا ڳئے جیندے وچ ساریاں سیاسی جماعتاں دے قومی یکجہتی دا مظاہرہ کیتا ویسی۔