وزیرِاعظم شہباز شریف اتے ملائیشیا دے وزیرِاعظم دا ٹیلیفونک رابطہ، بھارتی الزامات دی شفاف، معتبر اتے غیر جانبدارانہ تحقیقات کیتے پاکستان دی پیشکش دا اعادہ

لاہور۔ 4 مئی (اے پی پی) وزیرِاعظم شہباز شریف اتے ملائیشیا دے وزیرِاعظم داتو سری انور ابراہیم وچال ٹیلی فونک رابطہ تھئے، وزیرِاعظم پہلگام واقعے دے بعد بھارت دے اشتعال انگیز رویے دے نتیجے وچ جنوبی ایشیا وچ موجودہ کشیدگی تے پاکستان دی شدید تشویش دا اظہار کریندے بغیر کہیں ثبوت دے ایں واقعے نال پاکستان کوں جوڑݨ دی کہیں وی کوشش کوں واضح طور تے مسترد کر ݙتا اتے ایں واقعے دے پچھوں حقائق دا پتہ لاوݨ کیتے بین الاقوامی، شفاف، معتبر اتے غیر جانبدارانہ تحقیقات کیتے پاکستان دی پیشکش کوں ول دہرائے۔ وزیرِاعظم دفتر دے پریس ونگ موجب وزیرِاعظم شہباز شریف آکھیے پاکستان انھاں تحقیقات وچ ملائیشیا دی شرکت دا خیر مقدم کریسی۔ ایں ڳالھ تے زور ݙیندے ہوئیں جو پاکستان ہمیشہ دہشت گردی دی ہر شکل اتے ہر انداز دی مذمت کیتی اے، وزیرِاعظم دہشت گردی دے خلاف جنگ وچ فرنٹ لائن اسٹیٹ دے طور تے پاکستان دے کردار اتے ایں کوشش وچ ایندی وݙی قربانیاں کوں اجاگر کیتے۔ انہاں مزید آکھیا بھارت دے اقدامات پاکستان دی مغربی سرحد تے انسداد دہشت گردی دی کوششاں توں توجہ ہٹیندے پئن ۔ انہاں ایں ڳالھ تے زور ݙتا جو پاکستان ایہو جیھے جھیڑے وچ الجھݨ نی چاہندا، خاص طور تے ایں ویلھے جݙاں ملک اقتصادی استحکام دے رستے تے ٹُر پئے۔ ݙوہیں وزرائے اعظم پاکستان ملائیشیا تعلقات تے وی ڳالھ مہاڑ کیتی اتے ݙوطرفہ تعلقات کوں تکڑا بݨاوݨ اتے تجارت، سرمایہ کاری اتے ثقافتی تبادلیں سودھے مختلف شعبیاں وچ تعاون ودھاوݨ دے آپݨے سانجھے عزم دا اعادہ کیتے۔ ایں تناظر وچ وزیرِاعظم ݙسائے جو او ایں سال ملائیشیا دا سرکاری دورہ کرݨ دے منتظر ہن۔ اے ٹیلی فون کال پاکستان اتے ملائیشیا دے وچال نیڑے دوستی دی عکاس اے جیں وچ ݙوہیں رہنماواں علاقائی اتے بین الاقوامی پیشرفت تے رابطے وچ رہݨ تے اتفاق کیتے۔