سرینگر۔۵ مئی (اے پی پی) بھارت دے غیر قانونی طور قبضے جموں تے کشمیر اچ لوکاں دیاں زندگیاں سفاک بھارتی فورسز اہلکاراں دے رحم و کرم تے ہِن جئیں دی اڄوکی مثال ضلع کولگام اچ ہِک ۲۳ سالہ نینگر دا دوران حراست قتل ہے جئیں نال ۲۲ اپریل کوں پہلگام واقعے دے بعد ایں سویں شہادتیں دی تعداد پنج تھی ڳئی اے۔ کشمیر میڈیا سروس موجب مقتول دی سنڄاݨ امتیاز احمد ماگرے دے ناں نال تھئی ہے۔ اِیں کوں بھارتی فورسز ضلعے دے علاقے مزگام اچ محاصرے اتے تلاشی دی ہِک کارروائی وچال گرفتار کیتا ہا اتے دوران حراست تشدد دا نشانہ بݨا تے بے رحمی نال شہید کر ݙتا ڳئے۔ فوجیاں اِیں دی لاش کوں ہِک نالے اچ سٹ ݙتا ہا۔ اِیں دی لاش مقامی لوکاں ضلعے اچ آڑھ بل وٹو دے علاقے ڈی ایچ پورہ دے ہِک نالے توں برآمد کیتی۔ مقامی لوکاں قابض حکام دے خودکشی دے دعوے کوں مسترد کریندے ہوئے آکھیا جو متاثرہ شخص جیڑھا ہِک مزدور ہا، بھارتی فورسز چا تے ڳئے ہن اتے بعد اچ اِیں کوں دوران حراست تشدد دا نشانہ بݨایا ڳیا۔ حراستی قتل کوں کشمیریاں اچ خوف تے دہشت کھنڈاوݨ کیتے استعمال کیتا ویندا پئے۔ مقامی لوکاں ݙسایا جو پہلگام واقعے دے بعد بھارتی فورسز محاصرے اتے تلاشی دیاں کارروائیاں دی آڑ اچ کشمیریاں کوں جعلی مقابلیاں اچ شہید کریندی پئی ہے۔ انہاں دا آکھݨ ہا جو امتیاز احمد ماگرے دا قتل ۲۲ اپریل کوں پہلگام دے فالس فلیگ آپریشن دے بعد توں دوران حراست قتل دا پنجواں واقعہ ہے۔ اے ڳالھ قابل ذکر ہے جو مقبوضہ جموں تے کشمیر اچ ۱۹۸۹ توں ہݨ تئیں بھارتی فورسز ۹۶ ہزار توں ودھ کشمیریاں کوں شہید کیتے جِنہاں اچوں ۷۲۸۲ نوجواناں کوں دوران حراست شہید کیتا ڳئے۔
