اقوام متحدہ۔۵ مئی (اے پی پی) بھارت اتے پاکستان وچال ودھدی ہوئی کشیدگی تے اقوام متحدہ دی سلامتی کونسل دا بند کمرہ مشاورتی اجلاس سنوار کوں تھیسی۔ اقوام متحدہ اچ پاکستانی مشن توں جاری بیان موجب مشاورتی اجلاس دے انعقاد دی درخواست پاکستان کیتی ہے اتے اقوام متحدہ اچ پاکستان دے مستقل مندوب عاصم افتخار احمد مشاورتی اجلاس دے چھیکڑ تے بیان جاری کریسن۔ پاکستان اتے بھارت وچال کشیدگی ۲۲ اپریل کوں بھارت دے غیر قانونی زیر تسلط جموں و کشمیر دے قصبے پہلگام اچ تھیوݨ والے حملے دے بعد ودھ ڳئی ہئی جیں اچ ۲۶ لوک ہلاک تھی ڳئے ہن اتے بھارت بغیر کہیں ثبوت دے ایں حملے دا الزام پاکستان تے لایا ہا۔ پاکستان واضح طور تے ایں الزام کوں مسترد کریندے ہوئے غیر جانبدارانہ تحقیقات دا مطالبہ کیتے۔ کشیدگی اوں ویلھے ودھ ڳئی جݙاں بھارتی وزیر اعظم نریندر مودی اپݨے فوجی سربراہان کوں متنازعہ علاقہ کشمیر اچ حملے دا جواب ݙیوݨ کیتے ’’آپریشنل آزادی‘‘ ݙے ݙتی۔ پاکستان خبردار کیتے جو بھارت ولوں کہیں وی مہم جوئی دا فوری جواب ݙتا ویسی۔
