صدر آصف علی زرداری نال چین دے سفیر دی ملاقات، پہلگام واقعے دے بعد پاکستان اتے بھارت وچال صورتحال تے ڳالھ مہاڑ

اسلام آباد۔۵ مئی (اے پی پی) صدر مملکت آصف علی زرداری بھارتی حکومت دے اڄوکے غیر ذمہ دارانہ اتے جارحانہ بیانات تے تشویش کریندے ہوئیں آکھیا جو انہاں بھارتی اقدامات نال علاقائی امن تے استحکام کوں خطرہ لاحق اے۔ انہاں اے ڳالھ پاکستان اچ چین دے سفیر جیانگ زیڈونگ نال ملاقات اچ آکھی جِنہاں اِتھاں ایوان صدر اچ صدر مملکت نال ملاقات کیتی۔ سنوار کوں ایوان صدر دے پریس ونگ توں جاری بیان موجب ملاقات اچ ݙوپاسہ اہمیت دے معاملے خصوصی طور پہلگام واقعے دے بعد پاکستان اتے بھارت وچال اڄوکی صورتحال تے ڳالھ مہاڑ کیتی ڳئی۔ صدر مملکت آصف علی زرداری بھارتی حکومت دے اڄوکے غیر ذمہ دارانہ اتے جارحانہ بیانات تے تشویش کیتی اے۔صدر مملکت آصف علی زرداری آکھیا جو بھارت دے اقدامات نال علاقائی امن تے استحکام کوں خطرہ لاحق ہے۔ چینی سفیر چین اتے پاکستان وچال پائیدار اتے آزمودہ دوستی دا اعادہ کیتا اتے آکھیا جو ݙوہیں مُلک “آہنی بھرا” ہِن، ݙوہیں ہمیشہ مشکل ویلھے اچ ہِک ݙوجھے دا ساتھ ݙتے۔ چینی سفیر پاکستان دے نقطہ نظر کوں چین دے نال شیئر کرݨ تے صدر مملکت دا شکریہ ادا کیتا۔ چینی سفیر ٻیا آکھیا جو چین جنوبی ایشیا اچ امن تے استحکام دی ݙوہیں مُلکاں دی سانجھی خواہش دے حصول کیتے ہمیشہ پاکستان دی حمایت کریسی۔ صدر مملکت مشکل ویلھے اچ پاکستان دا ساتھ ݙیوݨ تے اتے چینی حکومت دی مسلسل حمایت دی تعریف کیتی۔