وفاقی وزیر اطلاعات عطاء اللہ تارڑ دا بین الاقوامی اتے مقامی میڈیا دے نال لائن آف کنٹرول دا دورہ، بھارتی پروپیگنڈے کوں بے نقاب کرݨ کیتے زمینی حقائق میڈیا دے سامݨے پیش کیتے ڳئے

اسلام آباد۔۵ مئی (اے پی پی): وفاقی وزیر اطلاعات و نشریات عطاء اللہ تارڑ بین الاقوامی اتے مقامی میڈیا دے نال لائن آف کنٹرول (ایل او سی) دے انہاں علاقیاں دا دورہ کیتے جِنہاں کوں بھارت واری واری پاکستان اچ مبینہ دہشت گردی دے ٹھکاݨے قرار ݙیندا رہ ڳئے۔ دورے دا مقصد بھارتی پروپیگنڈے کوں زمینی حقائق دے ذریعے بے نقاب کرݨ ہا تاں جو دُنیا خود ݙیکھ سڳے جو بھارت ولوں لائے ڳئے الزامات کتنے بے بنیاد، من گھڑت اتے گمراہ کن ہِن۔ وزارت اطلاعات تے نشریات ولوں ایں دورے اچ سہولت ݙتی ڳئی۔ میڈیا دے نمائندیاں کوں انہاں خاص جاہیں تے گھن تے ڳئے جِنہاں کوں بھارت ولوں مبینہ دہشت گردی دے ٹھکاݨے قرار ݙتا ڳیا ہا۔ زمینی حقائق، مقامی آبادی دی گواہی اتے حالات آپ ݙٰیکھ تے میڈیا کوں انہاں بھارتی دعویاں دی حقیقت جاݨݨ دا موقع مِلیا۔ ایں موقع تے ڳالھ مہاڑ کریندے ہوئے وفاقی وزیر اطلاعات عطاء اللہ تارڑ آکھیا جو بھارت ولوں واری واری پاکستان دے خلاف بے بنیاد الزامات لائے ڳئے ہِن لیکن اڄ اساں عالمی اتے مُلکی میڈیا دے سامݨے سارے حقائق رکھ ݙتن۔ جیہڑے جاہیں کوں بھارت خیالی دہشت گرد کیمپس قرار ݙیندا رہ ڳئے او دراصل عام شہری آبادی دے علاقے ہِن۔ انہاں آکھیا جو پاکستان ہِک ذمہ دار ریاست ہے جیڑھی نہ صرف علاقائی بلکہ عالمی امن کیتے وی پرعزم ہے۔ عطاء اللہ تارڑ ٻیا آکھیا جو پاکستان دُنیا دے کہیں وی حصے اچ دہشت گردی یا دہشت گردانہ سرگرمیاں دی مذمت کریندے۔ اساں اپݨے عمل نال واری واری ثابت کیتے جو اساں امن دے داعی ہئیں جڈانجو اپݨی خودمختاری دے دفاع کیتے اساں ہر حد تک ونڄݨ کیتے تیار ہئیں۔ وفاقی وزیر اطلاعات آکھیا جو بھارت ہِک پاسے پاکستان تے الزام تراشی کریندا پئے اتے ݙوجھی پاسے او خود اپݨے غیر قانونی زیر تسلط جموں و کشمیر اچ انسانی حقوق دی سنگین خلاف ورزیاں اچ ملوث اے۔ بھارت اپݨیاں داخلی ناکامیاں کوں لُکاوݨ کیتے لائن آف کنٹرول تے پروپیگنڈا کریندے پر اڄ عالمی میڈیا خود اپݨیاں اکھیں نال اصل حقیقت ݙیکھ گھدی ہے۔ انہاں آکھیا جو پاکستان ہِک واری ول دُنیا دے سامݨے واضح کر ݙتے جو او علاقائی امن کیتے پرعزم ہے اتے کہیں وی بھارتی جارحیت دا فوری اتے مُنہ ٻھن جواب ݙتا ویسی۔