سپریم کورٹ دے آئینی بینچ فوجی عدالتاں اچ عام شہریاں دے ٹرائل کوں کالعدم قرار ڈیوݨ دے فیصلے دے خلاف اپیلاں تے فیصلہ محفوظ کرڳھدے، جیڑھا اڄوکے ہفتے سُݨایا ویسی

اسلام آباد۔ 5 مئی (اے پی پی) سپریم کورٹ دے آئینی بینچ فوجی عدالتاں اچ عام شہریاں دے ٹرائل کوں کالعدم قرار ڈیوݨ دے فیصلے دے خلاف اپیلاں تے فیصلہ محفوظ کر ڳھدے، محفوظ فیصلہ ایں ہفتے سُݨایا ویسی۔ سپریم کورٹ دے جسٹس امین الدین خان دی سربراہی اچ ست رکنی آئینی بینچ فوجی عدالتاں اچ عام شہریاں دے ٹرائل کوں کالعدم قرار ڈیوݨ دے خلاف وزارت دفاع دی انٹرا کورٹ اپیل تے سماعت کیتی۔ بینچ اچ جسٹس جمال خان مندوخیل، جسٹس مسرت ہلالی، جسٹس محمد علی مظہر، جسٹس حسن اظہر رضوی، جسٹس نعیم اختر افغان اتے جسٹس شاہد بلال حسن شامل ہن۔ سماعت اچ اٹارنی جنرل منصور عثمان اعوان اپݨے دلائل جاری رکھیندے آکھیے جو 9 مئی کوں جیڑھا کجھ تھیا پہلے اوندے تے تھوڑی ڳالھ کریساں، سوچے سمجھیے منصوبے دے تحت فوجی تنصیبات تے حملہ کیتا ڳئے، 9 مئی کوں ݙینھ ترائے وجے توں شام تئیں مجموعی طور تے 39 جاہیں تے حملہ کیتا ڳیا۔ ایں ملک اچ وزیراعظم کوں پھاسی ڈتی ڳئی ول وی ایجھا احتجاج نی تھیا، ماضی اچ کہیں سیاسی جماعت فوجی تنصیبات تے حملہ نہ کیتا ہئی۔ جمہوریت بحالی تحریک اچ ساریاں جماعتاں تے پابندی ہئی، ایم آر ڈی دی ساری قیادت پابند سلاسل ہئی، اصغر خان ترائے ساڈھے ترائے سال تئیں نظر بند رہیے، ایں دوران وی 9 مئی جیھا قدم کہیں نی چاتا۔ اٹارنی جنرل آکھیا جو 9 مئی کوں ردعمل اچ وی جے اے سارا کجھ تھیا تاں ایندی اجازت نیں ݙتی ونڄ سڳدی، اساݙا ملک ہک عام ملک نی۔ جغرافیہ دی وجہ توں اساکوں ڈھیر سارے خطریں دا سامݨا رہندے۔ جسٹس جمال مندوخیل ریمارکس ݙتے اے سوال تاں ساݙے سامݨے ہے ہی کائناں جو جرم نی تھیا، تساں اپیل آلے پاسے آؤ، اپیل دا ݙساؤ۔ اٹارنی جنرل آکھیا اے سوال نہ وی موجود ہووے، ایں تے ڳالھ کرݨ ضروری اے۔ اٹارنی جنرل دلائل جاری رکھیندے ہوئیں آکھیے جو جناح ہاؤس حملے اچ غفلت ورتݨ تے فوج محکمانہ کارروائی کیتی، ترائے اعلیٰ افسراں کوں بغیر پنشن اتے مراعات دے ریٹائر کیتا ڳئے، بغیر پنشن ریٹائر تھیوݨ آلیں اچ ہک لیفٹیننٹ جنرل، ہک بریگیڈیئر اتے لیفٹیننٹ کرنل شامل ہن، 14 افسراں دی کارکردگی تے عدم اطمینان دا اظہار کیتا ڳئے، جئیں دا مطلب اے اے جو انہاں کوں مزید کوئی ترقی نی مل سڳدی۔ جسٹس جمال مندوخیل پچھیے کیا فوج کہیں افسر دے خلاف فوجداری کارروائی وی کیتی؟ اٹارنی جنرل آکھیا فوجداری کارروائی اوں ویلھدے تھیندی جݙاں جرم کیتا ویندے، محکمانہ کارروائی 9 مئی دا واقعہ نہ روکݨ تے کیتی ڳئی۔ جسٹس جمال مندوخیل ریمارکس ݙتے آرمی ایکٹ واضح اے جو محکمانہ کارروائی دے نال فوجداری سزا وی ہوسی۔ اٹارنی جنرل آکھیا جو پنجاب اچ تریوی، کے پی اٹھ ، سندھ ست اتے بلوچستان اچ ہک واقعہ تھیا، جی ایچ کیو، لاہور، ائیر بیس میانوالی، آئی ایس آئی دے دفتریں تے حملے تھئے، 9 مئی دے سارے واقعات اتفاقی کائںی ، 9 مئی کوں جے لاہور تے ٻاہرلی جارحیت تھیندی تاں جواب نہ ݙتا ونڄ سڳدا ہئی۔ جسٹس حسن اظہر رضوی ریمارکس ݙتن بھٹو دی پھاسی ویلھے لوک گرفتاریاں ݙیندے ہن، لوکاں اپݨے آپ کوں بھاہ لاتی، خودسوزیاں کیتیاں، کہیں اوں ویلھے پراپرٹی کوں بھاہ نی لاتی ۔ اٹارنی جنرل موقف اختیار کیتے میݙے پیو آپ بطور سیاسی کارکن مقدمے بھوڳیے، کݙاہیں کہیں دے ذہن اچ نی آیا جو پبلک پراپرٹی کوں ساڑ تے پراپرٹی کوں ضیان پُچایا ونڄے۔ جسٹس جمال مندوخیل پچھیے جو کیا 9 مئی کوں جیڑھا کجھ تھئے جرم دی نیت نال ہی تھیا؟ کیا نیت احتجاج ریکارڈ کراوݨ دی ہئی یا حملہ کرݨ دی؟ تھی سڳدے نیت احتجاج دی ہووے مگر معاملہ حد توں ودھ ڳیا؟ حد توں ودھ نہ ونڄݨاں چاہیدا ہئی مگر تھی ڳیا۔ اٹارنی جنرل موقف اختیار کیتے 9 مئی کوں جیڑھا کجھ تھئے جرم ہی ہئی۔ جسٹس نعیم اختر افغان ریمارکس ݙتے جو کیا بغیر پنشن ریٹائر تھیوݨ آلا جنرل کور کمانڈر لاہور ہئی؟ اٹارنی جنرل جواب ݙتا جی کور کمانڈر لاہور کوں ہی بغیر پنشن ریٹائر کیتا ڳئے۔ جسٹس جمال مندوخیل ریمارکس ݙتے ملک دے مستقبل کیتے اساں سوال پچھدے پیوں۔ جسٹس مسرت ہلالی ریمارکس ݙتے اساکوں وی اپݨے پیارے ملک دے مستقبل دی فکر اے، آرمی ایکٹ اچ کتنی واری ترمیم تھئی؟ اٹارنی جنرل جواب ݙتا ڈھیر واری آرمی ایکٹ اچ ترمیم تھی چکی اے۔ اٹارنی جنرل آکھیا فوجی عدالتاں دیاں سزاواں دے خلاف اپیلاں دائر تھی چکیاں ہن۔ ہݨ تئیں 86 مجرمان اپیلاں کر چکن، باقی لوکاں کوں اپیل دائر کرݨ ویلھے اچ رعایت ݙیسوں۔ بعد اچ آئینی بنچ فوجی عدالتاں اچ عام شہریاں دے ٹرائل کوں کالعدم قرار ڈیوݨ دے فیصلے دے خلاف اپیلاں تے فیصلہ محفوظ کر ڳھدے۔ جسٹس امین الدین خان آکھیے جو محفوظ کیتا ڳیا فیصلہ اڄوکے ہفتے سُݨایا ویسی۔