وفاقی وزیرصحت سید مصطفیٰ کمال دا پاکستان دی خارجہ پالیسی اچ صحت متعلق اقدامات کوں سٹریٹجک انداز اچ شامل کرݨ دی لوڑھ تے زور

اسلام آباد۔ 5 مئی(اے پی پی) وفاقی وزیر صحت سید مصطفیٰ کمال پاکستان دی خارجہ پالیسی اچ صحت متعلق اقدامات کوں سٹریٹجک انداز اچ شامل کرݨ دی لوڑھ تے زور ݙتے تاں جو پائیدار ترقی اتے علاقائی تعاون حاصل کیتا ونڄ سڳے۔ بین الاقوامی فورم ’’پرآشوب حالات اچ امن و خوشحالی دیاں راہواں‘‘ اچ کلیدی خطاب کریندے مصطفیٰ کمال اڄوکے پہلگام واقعہ دا ذکر کریندے آکھیے جو پاکستان امن دا خواہشمند اے مگر اپݨی خود مختاری تے کوئی سمجھوتہ نہ کریسی، پہلگام واقعہ تے بھارتی الزام تراشی بے بنیاد اے، اساں شفاف اتے غیر جانبدار تحقیقات کیتے تیار ہیسے ۔ ساݙی مسلح افواج اتے قیادت ٻہوں بردباری اتے حکمت نال جواب ݙے تے ثابت کیتے جو اساں امن چاہندوں، مگر اینکوں ساݙی کمزوری اصلوں نہ سمجھیا ونڄے، خطے دا امن صرف انصاف اتے سانجھے احترام نال قائم تھی سڳدے، دھونس نال کائناں۔ انہاں مزید آکھیے پاکستان دے اندر ماضی اچ تھیوݨ آلی دہشت گردی اتے اڄوکی دہشت گردی اچ جݙاں ایہ ڳالھ واضح ثابت تھی ڳئی اے جو ایندے پچھوں انڈیا دا ہتھ اے تاں میں سمجھداں جو ساݙے میڈیا کوں ایں بیانیہ کوں قومی اتے بین الاقوامی سطح تے اجاگر کرݨ کیتے منظم کردار ادا کرݨا چاہیدے اتے دنیا کوں انڈیا دا مکروہ چہرہ ݙکھاوݨا چاہیدے، ایں سانڳے جو اے ساݙی قومی ملی اتے اخلاقی ذمہ واری اے۔ اے اعلیٰ سطحی اجلاس عالمی ماہرین صحت، سفارتکاراں اتے ترقیاتی شراکت داراں کوں کٹھا کرݨ سانڳے منعقد تھئے، جتھاں پاکستان دے بدلدے کردار تے ڳالھ مہاڑ کیتی ڳئی جیڑھا جو او بین الاقوامی سطح تے صحت دے شعبے اچ کتھاں فعال کردار ادا کرسڳدے۔ مصطفیٰ کمال دے کلیدی خطاب دا عنوان ’’پاکستان دی خارجہ پالیسی اچ صحت متعلق اقدامات دا انضمام پائیدار ترقی‘‘ ہئی۔ اُنہاں اپݨی تقریر اچ ایں ڳالھ تے زور ݙتا جو صحت دا تعلق صرف داخلی پالیسی نال کائنی بلکہ اے قومی سلامتی، معاشی استحکام اتے عالمی امن سازی نال وی جڑیا ہویا اے۔ وزیر صحت تجویز ݙتی جو سرحد پار صحت دے تعاون کوں ودھارا ݙیوݨ اتے عالمی سطح تے پاکستان دی آواز کوں تکڑا بݨاوݨ کیتے ہک ہیلتھ ڈپلومیسی ٹاسک فورس بݨائی ونڄے۔ انہاں صحت دی اڄوکی پیشرفت، جیویں جو بنیادی سہولتاں تئیں رسائی اچ وسعت اتے بیماریاں دی نگرانی دے نظام اچ بہتری، کوں علاقائی صحت شراکت داریاں دی بنیاد قرار ݙتا۔ اُنہاں دا وژن صحت و فلاح اتے شراکت داری اہداف متعلق اقوام متحدہ دے پائیدار ترقی دے اہداف 3 اتے 17 نال ہم آہنگ ہئی۔ انہاں ٹیلی میڈیسن دے موضوع تے وی ڳالھ کریندے آکھیے جو ہݨ ویلھا اے جو انہاں دعویں کوں عملی شکل ݙتی ونڄے اتے ڈیجیٹل سہولتاں دے ذریعے پرے دے علاقیں اچ صحت دی سستی اتے وختی فراہمی کوں یقینی بݨایا ونڄے۔ انہاں نے ایں عزم دا اظہار کیتا جو اساں ڈاکٹراں اتےدوائیں کوں عوام دے دروازے تئیں پُڄیسوں، ساݙا موقف مدبرانہ اتے امن دا غماز اے، اساں شفاف اتے غیر جانبدار تحقیقات کیتے تیار ہیسے۔ بھارت جے اشتعال انگیزی کریسی یا سندھ طاس معاہدے اچ طے شدہ پاݨی دی ونڈ دے فارمولے نال چھیڑ چھاڑ کریسی تاں اساں سلھ دا جواب پتھر نال ݙیسوں۔ ساݙی مسلح افواج اتے قیادت ٻہوں بردباری اتے حکمت نال جواب ݙے تے ثابت کیتے جو اساں امن چاہندوں ، مگر ایکوں ساݙی کمزوری اصلوں نہ سمجھیا ونڄے ، خطے دا امن صرف انصاف اتے  سانجھے احترام نال قائم تھی سڳدے، دھونس نال کائناں۔