وزیراعظم محمد شہباز شریف دی صدارت ایف بی آر دے امور تے اجلاس، ٹیکس نیٹ ودھݨ اتے سرکاری آمدݨ اچ ودھارے کیتے جاری اصلاحات نال عام آدمی تے ٹیکس دا ٻوجھ گھٹ تھیسی، وزیراعظم

اسلام آباد۔ 5 مئی (اے پی پی) وزیراعظم محمد شہباز شریف آکھیے جو انکم ٹیکس آرڈیننس اتے فیڈرل ایکسائز ایکٹ دی مختلف شقاں اچ ترامیم دے تحت کاروباری شخصیات اتے کمپنیاں کوں ایف بی آر افسراں دی طرفوں بلاوجہ ہراساں کرݨ دی روک تھام اتے ٹیکس ادائیگی دے نظام کوں مزید سوکھا بݨایا ڳئے ، ٹیکس نیٹ ودھݨ اتے سرکاری آمدݨ اچ ودھارے کیتے جاری اصلاحات نال عام آدمی تے ٹیکس دا ٻوجھ گھٹ تھیسی۔ وزیراعظم دفتر دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت ایف بی آر دے امور تے اجلاس منعقد تھیا۔ وزیراعظم اجلاس نال خطاب کریندے آکھیے جو انکم ٹیکس آرڈیننس اتے فیڈرل ایکسائز ایکٹ دی مختلف شقاں اچ ترامیم دا مقصد ٹیکس دی وصولی اچ آندیاں رکاوٹاں کوں مکاوݨ اے۔ نویں ترمیم باقاعدگی نال ٹیکس ݙیوݨ آلے لوکاں اتے کمپنیاں دے حقوق تے اثر انداز نہ تھیسن۔ وزیراعظم آکھیے جو نویں ترمیم دے تحت کاروباری شخصیات اتے کمپنیاں کوں ایف بی آر افسراں دی طرفوں بلاوجہ ہراساں کرݨ کوں روکݨ اتے ٹیکس ادائیگی دے نظام کوں مزید سوکھا بݨایا ڳئے، ٹیکس نیٹ ودھݨ اتے سرکاری آمدݨ اچ ودھارے کیتے جاری اصلاحات نال عام آدمی تے ٹیکس دا ٻوجھ گھٹ تھیسی۔ وزیراعظم سارے شعبیاں اچ ٹیکس چوری، انڈر انوائسنگ اتے ݙوجھیاں بے ضابطگیاں دے خلاف ترجیحی بنیاداں تے اقدامات تکھے کرݨ دی ہدایت کریندے آکھیے جو غیر قانونی طور تے تیار شدہ سگریٹ اتے ݙوجھیاں چیزاں دی خرید و فروخت کرݨ آلیں دے خلاف سخت قانونی کارروائی کیتی ونڄے۔ اجلاس اچ وزیراعظم کوں مختلف شعبیاں اچ ٹیکس چوری دے خلاف کیتے ڳئے اقدامات دے حوالے نال ݙسایا ڳئے ، ایف بی آر اچ ڈیجیٹل مانیٹرنگ، ٹریک اینڈ ٹریس سسٹم اتے ݙوجھیاں اصلاحات تے کم جاری اے۔ بریفنگ اچ ݙسایا ڳئے جو تماخوں، سیمنٹ، پولٹری، شوگر، مشروبات اتے ݙوجھیاں صنعتاں اچ ٹیکس چوری دے خلاف اقدامات کیتے ویندے پئن، ایف بی آر وڈیو مانیٹرنگ دے ذریعے کئی صنعتاں اچ بے ضابطگیاں دی شناخت کرݨ اچ کامیاب تھئے۔ بریفنگ اچ ݙسایا ڳیا جو غیر قانونی تماخوں مصنوعات کوں ضبط کرݨ دے اختیارات صوبیاں کوں وی ݙتے ڳئن، پولٹری دی صنعت اچ وی ایف بی آر دا مانیٹرنگ دا نظام بݨایا ویندا پئے۔ اجلاس اچ وفاقی وزراء اعظم نذیر تارڑ، احد خان چیمہ، محمد اورنگزیب، چیئرمین ایف بی آر اتے متعلقہ اعلیٰ حکام شرکت کیتی۔