وزیراعظم محمد شہباز شریف اتے ایران دے وزیر خارجہ سید عباس عراقچی دی ملاقات

اسلام آباد۔5 مئی(اے پی پی) وزیراعظم محمد شہباز شریف آکھیے جو پاکستان ایران نال اپݨے تاریخی، گھاٹے بھرپی آلے تعلقات کوں ٻہوں اہمیت ݙیندے، پہلگام واقعے دے بعد ہندوستان دے اشتعال انگیز رویے دے نتیجے اچ جنوبی ایشیاء اچ موجودہ کشیدگی تے پاکستان کوں شدید تشویش اے۔ وزیراعظم دفتر دے میڈیا ونگ توں جاری پریس ریلیز موجب اسلامی جمہوریہ ایران دے وزیر خارجہ سید عباس عراقچی وزیراعظم محمد شہباز شریف نال ملاقات کیتی۔ وزیراعظم ایران دے شہر بندرعباس اچ تھیوݨ آلے المناک دھماکے دے نتیجے اچ قیمتی جاناں دے ضیان اتے سینکڑاں لوکاں دے زخمی تھیوݨ تے ایرانی وزیر خارجہ نال دلی تعزیت دا اظہار کیتا۔ انہاں اپݨے پیاریں کوں ونڄاوݨ آلیں سانڳے دعا کیتی اتے زخمیاں دی وختی صحت یابی کیتے وی دعا کیتی۔ وزیراعظم ایرانی سپریم لیڈر آیت اللہ علی خامنہ ای اتے صدر مسعود پیزشکیان کیتے نیک تمناواں دا اظہار کیتے۔ انہاں آکھیے پاکستان ایران نال اُپݨے تاریخی، گھاٹے بھرپی آلے تعلقات کوں ٻہوں اہمیت ݙیندے۔ صدر پیزشکیان نال آپݨیاں کئی ملاقاتاں اتے اڄوکی ٹیلی فون کال کوں یاد کریندے وزیراعظم پاکستان ایران ݙوطرفہ تعلقات اچ مثبت پیشرفت تے اطمینان دا اظہار کیتے اتے تجارت، توانائی، سرحدی انتظام اتے علاقائی رابطے اچ تعاون ودھاوݨ دی لوڑھ تے زور ݙتا۔ وزیراعظم پہلگام واقعے دے بعد ہندوستان دے اشتعال انگیز رویے دے نتیجے اچ جنوبی ایشیاء اچ موجودہ کشیدگی تے پاکستان دی شدید تشویش دا اظہار کیتے۔ انہاں بغیر کہیں ثبوت دے پاکستان کوں واقعے نال جوڑݨ دی کہیں وی کوشش کوں واضح طور تے مسترد کر ݙتا۔ انہاں آکھیے پاکستان پیشکش کیتی اے جو پہلگام واقعے دے پچھوں حقائق دا پتہ کرݨ کیتے بین الاقوامی شفاف، غیر جانبدار اتے معتبر تحقیقات کرائیاں ونڄن۔ انہاں آکھیے ایں ساری صورتحال اچ پاکستان ٻہوں ذمہ واری نال کم کیتے جݙاں جو ݙوجھے پاسے بھارت جموں و کشمیر دے جھیڑے توں دنیا دی توجہ ہٹاوݨ کیتے میڈیا دے ذریعے پروپیگنڈا شروع کر ݙتے جیڑھا جو جنوبی ایشیاء اچ عدم استحکام دی بنیادی وجہ اے۔ انہاں ایں ڳالھ تے وی زور ݙتا جو بھارت ولوں سندھ طاس معاہدے کوں معطل کرݨ اتے ایں کوں آبی جارحیت دے طور تے استعمال کرݨ ناقابل قبول اے کیوں جو پاݨی پاکستانی عوام کیتے ریڈ لائن دی حیثیت رکھیندے۔ وزیراعظم خطے اچ امن، استحکام اتے ترقی کیتے ایران نال رل تے کم کرݨ دے پاکستان دے عزم دا اعادہ کیتا۔ وزیر خارجہ عراقچی ایرانی قیادت ولوں وزیراعظم کوں تہنیتی پیغام پڄائے اتے پاکستان نال اپݨے تعلقات کوں تکڑا بݨاوݨ اتے جنوبی ایشیاء اچ امن و استحکام کیتے اپݨا کردار ادا کرݨ کیتے ایران دے عزم دا اعادہ کیتے۔ انہاں صدر پیزشکیان ولوں وزیراعظم کوں ایں سال دے دوران ایران دا سرکاری دورہ کرݨ دی دعوت دا وی اعادہ کیتے۔