دوحہ۔5 مئی (اے پی پی) وفاقی وزیر داخلہ محسن نقوی قطر دی وزارت داخلہ اچ قطر دے وزیر داخلہ خلیفہ بن حماد بن خلیفہ الثانی نال ملین۔ انہاں باہمی دلچسپی دے امور، ݙوطرفہ تعلقات اتے مختلف شعبیاں اچ تعاون ودھاوݨ تے ڳالھ مہاڑ کیتی۔ وزیر داخلہ محسن نقوی علاقائی صورتحال تے بریفنگ ݙیندے پاک بھارت کشیدگی بارے قطری ہم منصب کوں پاکستان دے اصولی موقف دا ݙسائے اتے آکھیے جو …
وفاقی وزیر داخلہ محسن نقوی دی قطر دے وزیر داخلہ خلیفہ بن حماد بن خلیفہ الثانی نال ملاقات
دوحہ۔5 مئی (اے پی پی) وفاقی وزیر داخلہ محسن نقوی قطر دی وزارت داخلہ اچ قطر دے وزیر داخلہ خلیفہ بن حماد بن خلیفہ الثانی نال ملین۔ انہاں باہمی دلچسپی دے امور، ݙوطرفہ تعلقات اتے مختلف شعبیاں اچ تعاون ودھاوݨ تے ڳالھ مہاڑ کیتی۔ وزیر داخلہ محسن نقوی علاقائی صورتحال تے بریفنگ ݙیندے پاک بھارت کشیدگی بارے قطری ہم منصب کوں پاکستان دے اصولی موقف دا ݙسائے اتے آکھیے جو پاکستان ہمیشہ جارحیت دی پالیسی مسترد کیتی اے۔ انہاں زور ݙتے جو بھارت کوں پہلگام واقعے دی آزادانہ اتے غیر جانبدارانہ تحقیقات دی پیشکش کیتی اے، دنیا دے سامݨے واقعے دی حقیقت آوݨی چاہیدی اے جو ایندا اصل ذمہ دار کون اے؟ محسن نقوی آکھیا جو پاکستان تے بے بنیاد اتے غیر منطقی الزام لاوݨ دہشت گردی دے خلاف جنگ اچ ساݙیاں عظیم قربانیاں کوں نظر انداز کرݨ دے مترادف اے۔ ملاقات اچ جرائم پیشہ مافیا اتے سائبر کرائمز دے خلاف مشترکہ اقدامات تے زور ݙتا ڳیا۔ قطر دے وزیر داخلہ پاکستان نال تعاون ودھاوݨ کیتے ٻئے اقدامات دی یقین دہانی کروائی۔ ملاقات اچ مختلف شعبیاں اچ شراکت داری ودھاوݨ کیتے فوکل پرسن مقرر کرݨ دا وی فیصلہ کیتا ڳیا۔ قطر دے وزیر مملکت داخلہ شیخ عبدالعزیز بن فیصل بن محمد الثانی، قطر اچ پاکستان دے سفیر محمد عامر اتے قطری وزارت داخلہ دے اعلی حکام وی ایں موقع تے موجود ہن۔
