وفاقی وزیر خزانہ محمد اورنگزیب دی صدارت اچ اقتصادی رابطہ کمیٹی دا اجلاس

اسلام آباد۔ 5 مئی (اے پی پی) وفاقی وزیر خزانہ و محصولات سینیٹر محمد اورنگزیب دی صدارت اچ اقتصادی رابطہ کمیٹی (ای سی سی) دا اجلاس تھئے، جیندے اچ اہم قومی مالیاتی تے توانائی منصوبیاں تے فیصلے کیتے ڳئے۔ اجلاس اچ پٹرولیم ڈویژن دی درخواست تے سوئی ناردرن گیس پائپ لائنز لمیٹڈ (ایس این جی پی ایل) کیتے جاری 50 ارب روپے دی خودمختار ضمانت دی مدت اچ جون 2026 تئیں ودھارے دی منظوری ݙتی ڳئی۔ پاور ڈویژن دی پیش کیتی ڳئی سمری تے ای سی سی بلوچستان اچ 27,000 زرعی ٹیوب ویلز دی سولرائزیشن دے منصوبے کیتے مزید 24.5 ارب روپے جاری  کرݨ دی منظوری ݙتی ڳئی۔ منصوبے تے وفاق تے صوبے دے وچ 70/30 دے تناسب نال خرچے کیتے ویسن۔ پاور ڈویژن کوں منصوبے تے موثر عملدرآمد یقینی بݨاوݨ تے جولائی اچ رپورٹ پیش کرݨ دی ہدایت کیتی ڳئی۔ کمیٹی مختلف وزارتاں دی طرفوں پیش کیتے ڳئے فنی ودھیک گرانٹس (ٹی ایس جی) دی منظوری وی ݙتی جنھاں اچ کابینہ ڈویژن کیتے 300 ملین روپے، وزارت خزانہ کیتے 1,269 ملین روپے، وزارت تعلیم کیتے 250 ملین روپے (صادق پبلک سکول دی اپ گریڈیشن کیتے)، وزارت داخلہ و انسداد منشیات کیتے مختلف مدت اچ مجموعی طور تے 637 ملین روپے، وزارت قانون و انصاف کیتے 556.8 ملین روپے تے پاور ڈویژن کیتے 106 ملین روپے شامل ہن۔ اجلاس اچ پاور ڈویژن ڈسٹری بیوشن کمپنیاں (ڈسکوز) دی گورننس متعلق سابقہ ای سی سی فیصلے تے پیش رفت دا ݙسائے ۔ ݙسایا ڳیا جو ساریاں کمپنیاں دے بورڈز دی نویں سروں تشکیل مکمل کر ڳھدی ڳئی اے (سوائے سیپکو تے حیسکو دے) تے انہاں دی کارکردگی دی مانیٹرنگ دا باقاعدہ نظام وی فعال تھی ڳئے۔ اجلاس اچ وزیر توانائی سردار اویس احمد خان لغاری، وزیر سرمایہ کاری قیصر احمد شیخ، متعلقہ وزارتاں دے سیکرٹریز تے ٻئے اعلیٰ حکام شرکت کیتی۔