خطے اچ امن تے خوشحالی دے ودھارے کیتے رَل تے کم کرݨ دی لوڑھ اے، بھارت دے جارحانہ اقدامات نال علاقائی امن تے استحکام کوں خطرہ اے، صدر آصف علی زرداری دی ایرانی وزیر خارجہ سید عباس عراقچی نال ڳالھ مہاڑ

اسلام آباد۔ 5 مئی (اے پی پی) صدر مملکت آصف علی زرداری خطے اچ امن تے خوشحالی دے ودھارے کیتے رَل تے کم کرݨ دی اہمیت تے زور ݙیندے آکھیے جو بھارت دے جارحانہ اقدامات نال علاقائی امن تے استحکام کوں خطرہ اے۔ ایوانِ صدر دے پریس ونگ موجب صدر مملکت نے اے ڳالھیں ایران دے وزیر خارجہ سید عباس عراقچی نال ڳالھ مہاڑ کریندے آکھیاں جنھاں سنوار کوں اتھاں ایوانِ صدر اچ انہاں نال ملاقات کیتی۔صدر مملکت آکھیے جو پاکستان تے ایران وچال تاریخی تے برادرانہ تعلقات ہن۔ ملاقات اچ ݙوہیں پاسوں دلچسپی دے امور تے ڳالھ مہاڑ تھئی۔ ملاقات اچ علاقائی سلامتی دی صورتحال خاص طور تے پہلگام واقعے دے بعد بھارت تے پاکستان دے وچ جاری کشیدگی تے ڳالھ مہاڑ تھئی۔ ایں موقع تے ایرانی وزیر خارجہ آکھیا جو پاکستان دا دورہ سپریم لیڈر آیت اللہ سید علی خامنہ ای تے ایرانی صدر مسعود پیزشکیان دی ہدایات تے کیتا ڳئے، موجودہ صورتحال تے پاکستان دا موقف سمجھدے ہیسے۔ ایرانی وزیر خارجہ کشیدگی گھٹ کرݨ کیتے فریقین تے تحمل دا مظاہرہ کرݨ تے زور ݙتا تے آکھیا جو ایران پاکستان نال تعلقات کوں اہمیت ݙیندے۔ سید عباس عراقچی آکھیے جو ایران پاکستان نال ݙوہیں پاسوں فیدے اچ ݙوپاسے تعلقات کوں مزید تکڑا بݨاوݨ دا خواہشمند اے۔ ایرانی وزیر خارجہ ݙوپاسے تجارت کوں ایندی پوری صلاحیت تئیں ودھاوݨ دی لوڑھ تے وی زور ݙتا۔ ملاقات اچ افغانستان دی صورتحال تے وی ڳالھ مہاڑ تھئی۔ ایرانی وزیر خارجہ خطے دے معاملات تے پاکستان نال رَل تے کم کرݨ دا یقین ݙیوائے ۔ صدر مملکت اہم موڑ تے دورہ پاکستان کرݨ تے ایرانی وزیر خارجہ دا شکریہ ادا کیتے۔ صدر مملکت مذاکرات تے سفارتکاری کیتے پاکستان دے عزم دا اعادہ کیتے۔ صدر مملکت ݙوہیں مُلکاں دے ݙوہیں پاسوں دے فیدے اچ ایران نال تجارت کوں ودھارا ݙیوݨ دی لوڑھ تے وی زور ݙتا۔ ملاقات اچ فریقین غزہ دی صورتحال تے وی ڳالھ مہاڑ کیتی۔ فریقین غزہ تے مغربی کنارے اچ اسرائیلی افواج دی طرفوں جاری ظلم تے انسانی حقوق دی خلاف ورزیاں دی مذمت کیتی۔ ایرانی وزیر خارجہ ایرانی صدر دی طرفوں صدر آصف علی زرداری کیتے نیک خواہشات دا وی اظہار کیتے۔