اسلام آباد۔6مئی(اے پی پی) اقوام متحدہ دی سلامتی کونسل دا بند کمرے اچ ھک مشاورتی اجلاس اڄ ایجنڈا آئٹم “بھارت پاکستان سوال” دے تحت منعقد تھئے۔ دفتر خارجہ توں جاری بیان موجب اجلاس علاقائی سلامتی دے وڳڑدے ماحول، بھارت اتے پاکستان وچال ودھدی کشیدگی اتے بھارت دے غیر قانونی طورتے زیر قبضہ جموں و کشمیر دی صورتحال تے ڳالھ مہاڑ سانڳے منعقد تھئے ۔ اے اجلاس پاکستان دی درخواست تے بھارت دے اڄوکے یکطرفہ اقدامات اتےاشتعال انگیز اعلانات دے پیش نظر سݙیا ڳیا ہئی جئیں توں فوجی تصادم دے خطرے اچ ودھارا تھئے تے علاقائی تے بین الاقوامی امن و سلامتی کوں خطرہ تھی ڳئے ۔ اجلاس اچ کونسل دے ارکان کشیدگی دے ودھدے خطرے تے گھاٹی تشویش کیتی تے تحمل اتے تنائو کوں گھٹ کرݨ دی لوڑھ تے زور ݙتے۔ انہاں کشیدگی مکاوݨ تے فوجی تصادم اتے جھیڑے توں بچݨ اتے مسئلیں کوں پرامن طریقے نال حل کرݨ سانڳے ڳالھ مہاڑ تے سفارت کاری تے زور ݙتے۔ کئی ارکان ایں ڳالھ تے زور ݙتے جو جموں و کشمیر دا پراݨا جھیڑا علاقائی عدم استحکام دی بنیادی وجہ اے اتے اینکوں سلامتی کونسل دی متعلقہ قرارداداں اتے کشمیری عوام دی امنگاں موجب حل کیتا ونڄݨا چاہیدے ۔ کونسل دے کئی ارکان بھارت دی طرفوں سندھ طاس معاہدے دی معطلی دے حوالے نال بین الاقوامی قانون اتے ذمہ واریاں دے احترام تے زور ݙتے۔
