اسلام آباد۔6 مئی(اے پی پی) اقوام متحدہ دی سلامتی کونسل دا بند کمرے اچ مشاورتی اجلاس ایجنڈا آئٹم “بھارت پاکستان سوال” دے تحت تھئے۔ دفتر خارجہ توں جاری بیان دے موجب ، اے اجلاس علاقائی سلامتی دے خراب تھیندے ماحول، بھارت اتے پاکستان وچال ودھدی کشیدگی اتے بھارت دے غیر قانونی طور تے زیر تسلط جموں و کشمیر دی صورتحال تے ڳالھ مہاڑ کیتے منعقد تھئے۔ اے اجلاس پاکستان دی درخواست تے بھارت دے اڄوکے یکطرفہ اقدامات اتے اشتعال انگیز اعلانات پاروں سݙیا ڳئے جیندے نال فوجی تصادم دے خطرے اچ ودھارا تھئے تے علاقائی اتے بین الاقوامی امن و سلامتی کوں خطرہ لاحق تھی ڳئے ۔ اجلاس اچ کونسل دے ارکان ودھدی ہوئی کشیدگی تے گھاٹی تشویش دا اظہار کیتے اتے تحمل اتے تناؤ کوں گھٹ کرݨ دی وختی لوڑھ تے زور ݙتا۔ انہاں کشیدگی کوں گھٹ کرݨ اتے فوجی تصادم اتے جھیڑیں توں بچݨ اتے مسئلیں کوں پرامن طریقے نال حل کرݨ کیتے ڳالھ مہاڑ اتے سفارت کاری تے زور ݙتے۔ کئی ارکان ایں ڳالھ تے زور ݙتا جو جموں و کشمیر دا پراݨا جھیڑا علاقائی عدم استحکام دی بنیادی وجہ اے اتے اینکوں سلامتی کونسل دی متعلقہ قرارداداں اتے کشمیری عوام دیاں امنگاں موجب حل کیتا ونڄݨاں چاہیدے۔ کونسل دے کئی ارکان بھارت ولوں سندھ طاس معاہدے دی معطلی دے حوالے نال بین الاقوامی قانون اتے ذمہ واریاں دے احترام تے زور ݙتا۔کونسل دے ارکان کوں بریفنگ ݙیندے اقوام متحدہ اچ پاکستان دے مستقل نمائندے عاصم افتخار احمد بھارت دے اشتعال انگیز اقدامات دا ذکر کیتا جیندے اچ 23 اپریل دے اعلان کیتے ڳئے یکطرفہ اقدامات اتے جارحانہ فوجی انداز وی شامل ہن۔ انہاں خبردار کیتے جو اے کارروائیاں بلا جواز اتے خطرناک ہن اتے ایندے تباہ کن نتیجے برآمد تھی سڳدن۔ کونسل دے ارکان کوں انٹیلی جنس معلومات دا ݙسایا ڳئے جیڑھا جو بھارت ولوں پاکستان دے خلاف متحرک کارروائی دے وختی خطرے دی نشاندہی کریندے۔ سلامتی کونسل دے ارکان کوں واضح کیتا ڳئے جو پاکستان اپݨی خودمختاری اتے علاقائی سالمیت دے دفاع کیتے پوری طرح تیار اے اتے کہیں وی جارحیت دی صورت اچ اقوام متحدہ دے چارٹر اچ درج اپݨے دفاع کیتے حاصل جائز حق دا استعمال کریسی۔ تاں جو پاکستان ایں ڳالھ کوں واضح کیتا جو او کشیدگی اچ ودھارا نی کیتا۔ پاکستان بھارت دے غیر قانونی زیر تسلط جموں و کشمیر اچ 22 اپریل دے حملے نال تعلق دے بھارت دے بے بنیاد الزامات کوں واضح طور تے مسترد کر ݙتے۔ انہاں آکھیا جو بھارت بے بنیاد الزامات بغیر کہیں تحقیقات یا قابل اعتماد ثبوت دے لاتن۔ ایں ڳالھ تے زور ݙتا ڳئے جو ایجھے واقعات کوں جارحیت دے جواز یا بین الاقوامی قانون دی خلاف ورزی کیتے استعمال کرݨ دی اجازت نی ہووݨی چاہیدی۔ یاد رہے جو بھارت ماضی اچ کشمیری عوام دی حق خودارادیت دی منصفانہ جدوجہد کوں کمزور کرݨ اتے اینکوں غیر قانونی قرار ݙیوݨ اتے اپݨے غیر قانونی زیر تسلط جموں و کشمیر اچ اپݨی ریاستی دہشت گردی اتے انسانی حقوق دی سنگین خلاف ورزیاں کوں لکاوݨ کیتے انہاں واقعات کوں استعمال کیتے۔ ایں موقع تے پاکستان دے خلاف ریاستی سرپرستی اچ تھیوݨ آلی دہشت گردی اتے پاکستان اتے ٻئی جاہ تے ٹارگٹ کلنگ اچ بھارت دے ملوث ہووݨ کوں وی اجاگر کیتا ڳئے۔ کونسل دے اراکین کوں 1960ء دے تاریخی سندھ طاس معاہدے کوں معطل کرݨ دے بھارت دے یکطرفہ فیصلے دا وی ݙسایا ڳئے جیڑھا عالمی بینک دی ثالثی اچ ہک قانونی طور تے پابند معاہدہ اے۔ پاکستان خبردار کیتے جو ایندے دریائی پاݨی دے قدرتی وہݨ اچ رکاوٹ پاوݨ یا ایندا رخ موڑݨ دی کوئی وی کوشش جنگ دی کارروائی ہوسی۔ پاکستان اقوام متحدہ دے سیکرٹری جنرل اتے کونسل دے ارکان ولوں مذاکرات اتے کشیدگی گھٹاوݨ سانڳے کیتی ڳئی پیشکش دا خیرمقدم کیتے اتے اے جو انہاں کشیدگی کوں گھٹ کرݨ کیتے سفارتی کوششاں تکھیاں کرݙتن ۔ بین الاقوامی برادری خاص طور تے سلامتی کونسل کیتے اے ضروری اے جو او ایجھے جھیڑے توں بچݨ کیتے وختی اتے ذمہ داری دے نال کم کرے جیندے جنوبی ایشیا اتے ایندے توں ٻاہر تباہ کن نتیجے برآمد تھی سڳدن۔ اے ڳالھ قابل ذکر اے جو “بھارت پاکستان سوال” اقوام متحدہ دی سلامتی کونسل دے ایجنڈے تے ساریں توں پراݨے آئٹمز اچوں ہک اے جیندے تحت اقوام متحدہ دی سلامتی کونسل اچ جموں و کشمیر دا پراݨا جھیڑا موجود اے۔
