قومی یوتھ پالیسی سانگے صلاح مشورے کیتے سیشن شروع تھی ڳئے، اڄوکی حکومت نینگراں دے مستقبل کوں روشن بݨاوݨ سانگے اقدامات کریندی پئی اے، رانا مشہود احمد

ڈیرہ غازی خان ۔ 06 مئی (اے پی پی) چیئرمین وزیر اعظم یوتھ پروگرام رانا مشہود احمد خان آکھیا جو قومی یوتھ پالیسی سانگے پورے ملک دے نینگراں دے رَل تے صلاح مشورے آلے سیشناں دا آغاز کر ݙِتا ڳئے، بھارت اپݨے کوڑے پروپگنڈے نال خطے دا امن تباہ کرݨ چاہندے، اگر ایں جھڑپ کیتی تاں پاکستان ول مار جواب ݙیسی، موسمیاتی تبدیلیاں نال نبڑݨ سانگے بئے سارے اقدامات کیتے ویندے پئن، اسرائیل دا فلسطین اچ

نہتے مسلماناں کوں مارݨ بہوں افسوسناک اے، امت دا ہک تھیوݨ ویلھے دی لوڑھ اے۔ایہہ گالھیں انہاں منگل دے ݙینھ غازی یونیورسٹی اچ National Adolescent and youth policy consultation دے موضوع تے تھیوݨ آلے سیمینار توں خطاب کریندے ہوئیں کیتی۔ ایں موقع تے غازی یونیورسٹی دے وائس چانسلر پروفیسر ڈاکٹر اشفاق احمد اتے پروفیسر ڈاکٹر ارشد لغاری اتے بئے وی انہاں دے نال ہن۔رانا مشہود احمد آکھیا جو ڈیرہ غازی خان اچ سرائیکی، پنجابی اتے بلوچ دے علاوہ ٻئی قوماں وی رَل مِل تے رہندن۔ انہاں آکھیا جو اڄوکی حکومت نینگراں دے مستقبل کوں روشن بݨاوݨ سانگے بئے سارے اقدامات کریندی پئی اے اتے ایں بارے اساں 2013 اچ پہلی واری یوتھ پالیسی شروع کرائی جئیں کوں بہوں چنڳا منّیا ڳیا۔

رانا مشہود آکھیا جو میں گزریل ہفتے خیبر پختونخواہ دا دورہ کر تے اتھاں دے نینگراں نال مختلف سیشناں اچ ملاقاتاں کیتیاں اتے اتھاں میکوں پتا لڳا جو اتھاں دی صوبائی حکومت گزریل کئی سالاں توں کوئی نویں یونیورسٹی نئیں بݨائی بلکہ یونیورسٹیاں کوں اپݨے خرچے پورے کرݨ سانگے آکھیا جو او اپݨے اثاثے ویچ تے اپݨا نظام چلاون۔انہاں آکھیا جو ٻئے پاسوں وزیر اعلیٰ پنجاب مریم نواز شریف دی اڳواݨی اچ پنجاب حکومت زور شور نال نینگراں کوں بااختیار بݨاوݨ دے مختلف منصوبیاں تے کم کریندی پئی اے اتے پنجاب دیاں مختلف یونیورسٹیاں اچ نویں 32 وائس چانسلر لائے ڳئن تاں جو تعلیمی نظام کوں چنڳے طریقے نال چلایا ونڄ سڳے۔ انہاں آکھیا جو غازی یونیورسٹی ڈیرہ غازی خان دا چارٹرڈ وی میں 2014 اچ پیش کیتا ہا اتے میکوں اتھاں آ تے پتا لڳا جو 2019 دے بعد اتھاں کوئی کانووکیشن نئیں تھیا اتے گزریل ݙینھاں تھیوݨ آلے کانووکیشن اچ 2019 توں 2023 تئیں پاس تھیوݨ آلے طالب علماں اچ اسناد ونڈیاں ڳئن۔انہاں آکھیا جو اڄوکے وائس چانسلر پروفیسر ڈاکٹر اشفاق احمد بہوں محنت اتے لڳن نال کم کریندے پئن اتے اساکوں انہاں دیاں صلاحیتاں تے فخر اے۔

رانا مشہود آکھیا جو یونیورسٹی انتظامیہ ولوں میکوں ݙسیا ڳئے جو ہݨ اتھاں کانووکیشن سالانہ بنیاد تے کیتا ویسی اتے ایں بارے کوئی دیر نہ کیتی ویسی۔ انہاں آکھیا جو مسلم لیگ ن دی حکومت پنجاب اچ طالب علماں کوں نویں علم اتے آئی ٹی دے علم نال واقف کراوݨ سانگے 10 لکھ لیپ ٹاپ ونڈے ہن جݙاں جو وفاق اچ وی 7 لکھ توں ودھ لیپ ٹاپ ونڈے ونڄ چکے ہن۔انہاں آکھیا جو ملائشیا پاکستان اچ لائیو سٹاک دے بارے اچ بہوں دلچسپی رکھیندے اتے او لائیو سٹاک اچ 200 ملین ڈالر تئیں خرچ کرݨ چاہندے ۔ ڈیرہ غازی خان لائیو سٹاک دے بارے اچ پورے ملک وچوں بہترین علاقہ سمجھیا ویندے، اساڈی کوشش اے جو ڈیرہ غازی خان ڈویژن اچ لائیو سٹاک کوں ودھایا ونڄے۔ رانا مشہود آکھیا جو مسلم لیگ ن دی حکومت جݙاں وی حکومت اچ آئی اے، ایں تعلیم، صحت اتے انفراسٹرکچر سمیت بئے منصوبیاں تے پہلے نمبر تے کم کیتے۔انہاں آکھیا جو بھارت پاکستان تے جنگ لاگو کرݨ دی کوشش کریندے پئے اتے ایں کوڑا پروپیگنڈے کر تے پاکستان کوں بدنام کرݨ دی ناکام کوشش کیتی اے، ہݨ وی اینکوں ہار منݨی پئی اے اتے ایندا مُنہ دنیا دے سامݨے آ ڳئے ۔

انہاں آکھیا جو پاکستان ایٹمی ملک اے اتے پاک فوج سرحداں تے اپݨے وطن دی حفاظت کرݨ جاݨدی اے، بھارت دے ہر کوڑے پروپیگنڈے اتے سازش کوں ناکام بݨایا ویسی۔ انہاں آکھیا جو بھارت پاکستان نال چار جنگاں کر چکے اتے ایندی جھڑپ دا پاک فوج ہمیشہ چنڳے طریقے نال ول مار جواب ݙتے۔انہاں آکھیا جو میاں نواز شریف آپݨے پچھلے دور حکومت اچ بین الاقوامی دباؤ کوں نہ منیندے ہوئیں پاکستان کوں ایٹمی طاقت بݨاوݨ دا خواب پورا کیتا، ڈاکٹر قدیر خان اتے میاں نواز شریف اساݙے ملک دے محسن ہن۔ انہاں آکھیا جو اسرائیل ظلم نال فلسطین اچ ظلم کریندے پئے، مسلم امہ کوں کٹھا تھی تے ایندا زور دار جواب ݙیوݨا چاہیدے۔رانا مشہود آکھیا جو ڈیجیٹل یوتھ ہب ایپ اے آئی بیسڈ اے جیڑھی نینگراں دی چنڳی رہنمائی کریندی پئی اے، اتھاں ایں ویلھے 2 لکھ توں ودھ نوکریاں ایندے تے موجود ہن۔

انہاں آکھیا جو نیٖنگر نویں ٹیکنالوجی اتے اپݨیاں صلاحیتاں کوں استعمال کریندے ہوئیں ملک اتے قوم دی خدمت کرن، اولمپکس 2028 دیاں تیاریاں دے بارے اچ ٹیلنٹ ہنٹ پروگرام وی شروع کر ݙِتا ڳئے تاں جو ارشد ندیم سویں ستارے سامݨے گھن آئے ونڄ سڳن۔ایں موقع تے خطاب کریندے ہوئیں یونیورسٹی دے وائس چانسلر پروفیسر ڈاکٹر اشفاق احمد ادارے اچ چلݨ آلے ترقیاتی کماں اتے بئے معاملیاں تے روشنی پاتی۔