اسلام آباد۔ 6 مئی (اے پی پی) ملکی عسکری تے سیاسی قیادت ولوں مادر وطن دے دفاع سانڳے پاکستان دے پکے عزم دا اعادہ کریندے ہوئیں واضح کیتا ڳئے جو قوم دی پوری حمایت نال پاکستان دیاں مسلح فوجاں قومی طاقت دے ٻئے سارے عناصر اتے ریاستی اداریاں دے تعاون نال پاکستان دی سلامتی اتے عزت تے وقار دے تحفظ دا ہر حال وچ دفاع کرݨ سانڳے پوری طرح تیار …
وزیراعظم محمد شہباز شریف دا انٹر سروسز انٹیلی جنس ہیڈکوارٹرز دا دورہ، پاکستان دی مشرقی سرحد تے بھارت دے ودھدے ہوئے جارحانہ اتے اشتعال انگیز رویے دے تناظر وچ روایتی خطرے نال نبڑݨ دی تیاریاں اتے سلامتی دی اڄوکی صورتحال تے تفصیلی بریفنگ
اسلام آباد۔ 6 مئی (اے پی پی) ملکی عسکری تے سیاسی قیادت ولوں مادر وطن دے دفاع سانڳے پاکستان دے پکے عزم دا اعادہ کریندے ہوئیں واضح کیتا ڳئے جو قوم دی پوری حمایت نال پاکستان دیاں مسلح فوجاں قومی طاقت دے ٻئے سارے عناصر اتے ریاستی اداریاں دے تعاون نال پاکستان دی سلامتی اتے عزت تے وقار دے تحفظ دا ہر حال وچ دفاع کرݨ سانڳے پوری طرح تیار اے۔ وزیراعظم آفس دے میڈیا ونگ توں جاری بیان موجب وزیراعظم محمد شہباز شریف منگل کوں نائب وزیراعظم اتے وزیر خارجہ اسحاق ڈار اتے وزیر دفاع خواجہ محمد آصف اتے مسلح فوجاں دے سربراہان دے رلے انٹر سروسز انٹیلی جنس (آئی ایس آئی) ہیڈکوارٹرز دا دورہ کیتا۔ دورے وچال وزیراعظم کوں پاکستان دی مشرقی سرحد تے بھارت دے ودھدے ہوئے جارحانہ اتے اشتعال انگیز رویے دے تناظر وچ روایتی خطرے نال نبڑݨ دی تیاریاں اتے سلامتی دی موجودہ صورتحال تے تفصیلی بریفنگ ݙٹتی گئی۔ قیادت کوں علاقائی سلامتی دے حوالے نال تھیوݨ آلی پیش رفت اتے اُبھرݨ آلے خطرات توں آگاہ کیتا ڳئے جئیں وچ روایتی فوجی آپشنز، ہائبرڈ وار فیئر دی حکمت عملی اتے دہشت گردی دیاں پراکسیز شامل ہن۔ وزیراعظم اتے انہاں دے نال موجود شخصیتاں پاکستان دی خودمختاری اتے علاقائی سالمیت دی کہیں وی خلاف ورزی کوں روکݨ اتے فیصلہ کن جواب ݙیوݨ سانڳے قومی نگرانی ودھاوݨ، بِن رُکے انٹر ایجنسی تعاون اتے آپریشنل تیاریاں کوں مضبوط بݨاوݨ دی لوڑ تے زور ݙتا۔ وزیراعظم شہباز شریف آئی ایس آئی دی پیشہ وارانہ مہارت اتے تزویراتی بصیرت دی تعریف کریندے ہوئیں قومی مفادات دے تحفظ اتے اوکھے اتے بدلدے ہوئے حالات وچ قومی سلامتی دے حوالے نال فیصلہ سازی وچ ایندے اہم کردار دی تعریف کیتی۔ وزیراعظم آکھیا جو پوری قوم ساݙیاں بہادر مسلح فوجاں دے پچھوں کھڑی اے، پاک فوج دنیا دیاں سب توں زیادہ پیشہ ورانہ اتے نظم و ضبط آلی فورسز وچ شمار تھیندی اے۔ قیادت روایتی یا ٻئے سارے خطرات دے خلاف وطن دے دفاع سانڳے پاکستان دے پکے عزم دا اعادہ کریندے ہوئیں ٻیا آکھیا جو قوم دی پوری حمایت نال پاکستان دیاں مسلح فوجاں قومی طاقت دے سارے عناصر اتے ریاستی اداریاں دے تعاون نال ہر حال وچ پاکستان دی سلامتی اتے عزت تے وقار کوں برقرار رکھݨ سانڳے پوری طرح تیار ہن۔
